Qorǵastaǵy adam ólimine baılanysty sot úkimi shyǵady
TALDYQORǴAN. QazAqparat - Búgin Qorǵastaǵy adam ólimine baılanysty sot úkimi shyǵady. Protsess Taldyqorǵan qalasyndaǵy Almaty oblysynyń qylmystyq ister jónindegi mamandandyrylǵan aýdanaralyq sotynda ótedi, dep habarlaıdy QazAqparat tilshisi.
22 tamyzda bastalǵan sot protsesiniń sońǵy otyrysy búgin saǵat 14:30ǵa belgilendi. Dál qazir sot zalynda qos tarap jaryssózge shyqty. Alaıda aıyptalýshy oryndyǵynda otyrǵan Dıas Káripjanov taǵylǵan aıyppen kelispeıtinin jetkizdi. Onyń sózinshe ol Qýanysh Tólegenovty qasaqana óltirmegen. Jáne ol istegen áreketine qatty ókinetinin, qylmysyn jartylaı moıyndaıtyndyǵyn jetkizdi.
22 jastaǵy kúdikti QR QK 99-baby ıaǵnı, «Qasaqana adam óltirý» faktisi boıynsha aıyptalýda.
Esterińizge sala keteıik, bul oqıǵa bıyl 4 maýsymda «Qorǵas» shekara mańy yntymaqtastyq halyqaralyq ortalyǵynyń aýmaǵynda boldy. Panfılov aýdanynyń turǵyny D. Káripjanov óziniń tanysy Q. Tólegenovpen ózara sózge kelispeı, onyń keýde tusyna pyshaq suǵyp alǵan.
25 jastaǵy azamat alǵan jaraqatynan keıin Jarkenttegi aýrýhanaǵa jetpesten kóz jumdy. Adam óltirý oqıǵasy beınebaqylaý kamerasyna túsip qalǵan bolatyn.
