Qorǵastaǵy adam ólimine baılanysty sot aıaqtalýǵa jaqyn
TALDYQORǴAN.QazAqparat - Almaty oblysynda «Qorǵas» ShYHO aýmaǵyndaǵy adam ólimine baılanysty sot aıaqtalýǵa jaqyn, dep habarlaıdy QazAqparat tilshisi.
22 tamyzda bastalǵan sot protsestiń kelesi otyrysy qyrkúıektiń 14-ne belgilendi. Saǵat 11:00 de bastalatyn is Taldyqorǵan qalasyndaǵy Almaty oblysynyń qylmystyq ister jónindegi mamandandyrylǵan aýdanaralyq sotynda ótedi. Bul joly qos tarap jaryssózge shyǵady. Alaıda aıyptalýshy oryndyǵynda otyrǵan Dıas Káripjanov taǵylǵan aıyppen kelispeıtinin jetkizdi. Onyń sózinshe ol Qýanysh Tólegenovty qasaqana óltirmegen. Jáne ol istegen áreketine qatty ókinetinin, qylmysyn jartylaı moıyndaıtyndyǵyn jetkizdi.
22 jastaǵy kúdikti QR QK 99-baby ıaǵnı, «Qasaqana adam óltirý» faktisi boıynsha aıyptalýda.
Esterińizge sala keteıik, bul oqıǵa bıyl 4 maýsymda «Qorǵas» shekara mańy yntymaqtastyq halyqaralyq ortalyǵynyń aýmaǵynda boldy.
Panfılov aýdanynyń turǵyny D. Káripjanov óziniń tanysy Q. Tólegenovpen ózara sózge kelispeı, onyń keýde tusyna pyshaq suǵyp alǵan. 25 jastaǵy azamat alǵan jaraqatynan keıin Jarkenttegi aýrýhanaǵa jetpesten kóz jumdy. Adam óltirý oqıǵasy beınebaqylaý kamerasyna túsip qalǵan bolatyn.
