Qorǵastaǵy adam ólimi: Qorǵaýshy aıyptalýshydan 23 mln teńge talap etti
TALDYQORǴAN. QazAqparat - Taldyqorǵanda Qorǵastaǵy adam ólimine baılanysty sot otyrysy jalǵasýda. Jábirlenýshi taraptyń qorǵaýshysy aıyptalýshy Dıas Káripjanovtan moraldyq jáne materıaldyq shyǵyn kólemin ótep berýdi talap etti, dep habarlaıdy QazAqparat tilshisi sot zalynan.
Jábirlenýshi taraptyń qorǵaýshysy talap etken shyǵynnyń jalpy sommasy 23 178 875 teńge. Onyń ishinde 20 mln teńge moraldyq, al qalǵany materıaldyq shyǵyn dep eseptelgen. Alaıda, aıyptalýshy, bul shyǵyn kólemin tóleýge shamam jetpeıdi dep jaýap berdi. Dıas Káripjanov marqumdy jerleýge ketken shyǵyndardy óteýge kelisetinin bildirdi. Biraq, moraldyq shyǵyn kólemimen kelisesiz be, degen sýdıanyń suraǵyna jaýap bermedi. Búgin sot protsessi aıaqtalýy múmkin. Qazir úzilis jarııalandy.
Esterińizge sala keteıik, sot protsessi 22 tamyzda bastaldy. Alaıda aıyptalýshy oryndyǵynda otyrǵan Dıas Káripjanov taǵylǵan aıyppen kelispeıtinin jetkizdi.
Onyń sózinshe, ol Qýanysh Tólegenovti qasaqana óltirmegen jáne ol istegen áreketine qatty ókinetinin, qylmysyn jartylaı moıyndaıtyndyǵyn jetkizdi. 22 jastaǵy kúdikti QR QK 99-baby ıaǵnı, «Qasaqana adam óltirý» faktisi boıynsha aıyptalýda.
Aıta keteıik, bul oqıǵa bıyl 4 maýsymda «Qorǵas» shekara mańy yntymaqtastyq halyqaralyq ortalyǵynyń aýmaǵynda boldy. Panfılov aýdanynyń turǵyny D. Káripjanov óziniń tanysy Q. Tólegenovpen ózara sózge kelispeı, onyń keýde tusyna pyshaq suǵyp alǵan. 25 jastaǵy azamat alǵan jaraqatynan keıin Jarkenttegi aýrýhanaǵa jetpesten kóz jumdy. Adam óltirý oqıǵasy beınebaqylaý kamerasyna túsip qalǵan bolatyn.
