«Qorǵasta» zamanaýı azyq-túlik haby qurylady
2026 jylǵa qaraı «Qorǵas» bazasynda zamanaýı azyq-túlik habyn qurý josparlanǵan. Bul týraly Májilis depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy Kazinform.
«2026 jylǵa qaraı „Qorǵas“ bazasynda azyq-túlikti saqtaýǵa jáne taratýǵa baǵyttalǵan zamanaýı azyq-túlik habyn qurý josparlanyp otyr. Azyq-túlik habyn qurý — memlekettik deńgeıdegi mindet. Onyń sheshimi halyqaralyq taýar almasýǵa serpin berýge, agroóndiristi yntalandyrýǵa jáne óńirlik deńgeıdegi aralas ınfraqurylymdy (qoımalar, saqtaý oryndary, keptirgishter, jergilikti qaıta óńdeý qýattary) qalyptastyrýǵa múmkindik beredi», — dep atap ótedi Úkimet basshysy jaýabynda.
Onyń atap ótýinshe, atalǵan bastamany iske asyrý úshin «Atameken» ulttyq kásipkerler palatasymen jáne Qazaqstannyń saýda kásiporyndary qaýymdastyǵymen birlesip, saýda-logıstıkalyq hab arqyly iri kóterme saýda múmkindigin zańnamalyq bekitý jumysy júrgizilip jatyr.
Bul rette saýda salasyndaǵy zańnamany ózgertýdiń mynadaı 2 tásili qarastyrylyp jatyr:
— «iri kóterme jáne shaǵyn kóterme saýda» uǵymdaryn engizý jáne saýda-logıstıkalyq hab pen kóterme-taratý ortalyqtary arqyly iri kóterme saýdany qaıta baǵdarlaý;
— kóterme saýdanyń saýda-logıstıkalyq hab jáne kóterme-saýda ortalyqtary arqyly tolyq aýysýy.
«Osy jyldyń 11 qazanda Saýda jáne ıntegratsııa mınıstrligi „Atameken“ UKP alańynda osy tásilderdi talqylaý júrgizdi. Nátıjeleri boıynsha barlyq aıtylǵan ustanymdardy eskere otyryp, „Atameken“ UKP shoǵyrlandyrylǵan ustanymyn daıyndaý týraly sheshim qabyldandy», — dedi Álıhan Smaıylov.
