Qorǵasta iri saýda-logıstıkalyq keshenniń qurylysy bastaldy
TALDYQORǴAN. KAZINFORM — Búgin «Qorǵas» halyqaralyq shekara mańy yntymaqtastyq ortalyǵy aýmaǵynda «Qazaqstan-Qytaı dostyq aımaǵy» jobasynyń saltanatty ashylý rásimi ótti.
Jańa keshen «Qorǵas» ShYHO-nyń qazaqstandyq bóliginde ornalasady. Onda saýda, logıstıka, ónerkásiptik servıs, tsıfrlyq ınfraqurylym jáne iskerlik qyzmetterdi biriktiretin kópfýnktsıonaldy zamanaýı keshen salý kózdelgen. Jobany qazaqstandyq jáne qytaılyq ınvestorlar birlesip júzege asyryp jatyr.
Uıymdastyrýshylyq turǵyda Qazaqstan-Qytaı halyqaralyq ekonomıkalyq damý ortalyǵy qoldaý kórsetip otyr.
Bul nysan transshekaralyq saýdany damytýǵa, týrıstik aǵyndy arttyrýǵa jáne óńirdiń ınvestıtsııalyq tartymdylyǵyn kúsheıtýge yqpal etedi dep kútiledi.
«Qazaqstan-Qytaı ınvestıtsııalyq ortalyǵynyń» qazaqstandyq taraptan teń tóraǵasy Jambyl Ahmetbekovtiń aıtýynsha, joba «Qorǵasqa» keletin kásipkerler men týrıster úshin qolaıly jaǵdaı jasap, saýda men qyzmet kórsetý salasynyń damýyna serpin beredi.
— Bul ortalyq eki el kásipkerleri úshin tıimdi platforma bolady. Demalys oryndar men sapaly qyzmet kórsetiledi. Munda iskerlik kelissózder júrgizilip, kelisimsharttar jasalyp, saýda qatynastary bir jerde úılestiriledi. «Bir tereze» qaǵıdaty boıynsha keden, logıstıka, qarjy, aýdarma, zań jáne esep aıyrysý qyzmetteri usynylady, — dedi ol.
Joba Qazaqstan aýmaǵynda júzege asyrylatyndyqtan, barlyq salyqtyq túsimder memlekettik bıýdjetke baǵyttalady. Investorlardyń boljamynsha, bul bastama «Qorǵas» ShYHO-nyń qazaqstandyq bóligindegi salyq túsimderin eki esege arttyrýy múmkin.
Joba birneshe kezeńmen júzege asyrylady. Alǵashqy kezeńde Qazaqstan men Qytaı arasyndaǵy taýarlardy saqtaýǵa arnalǵan iri logıstıkalyq ortalyq pen qoımalar salý kózdelgen. Keshen quramynda zamanaýı qoımalar, onyń ishinde salqyndatylǵan saqtaý oryndary qarastyrylǵan.
Qazaqstan-Qytaı ınvestıtsııalyq ortalyǵynyń tóraǵasy Sýn Tszıanchjýn bul joba jańa jumys oryndaryn ashýǵa múmkindik beretinin aıtty.
— Aldyn ala boljam boıynsha alǵashqy kezeńniń ózinde Qazaqstanda myńǵa jýyq jumys orny qurylady. Biz bul jobany tek kórsetilimdik nysan emes, Qazaqstan men Qytaı arasyndaǵy úlgili ári joǵary sapaly jobaǵa aınaldyrýdy maqsat etip otyrmyz, — dedi ol.
Onyń aıtýynsha, birinshi kezeńde jalpy aýmaǵy 800 myń sharshy metr bolatyn kórme-saýda kesheni salynady. Onda Qazaqstannyń barlyq óńiri men Qytaıdyń ónimderi usynylady. Sondaı-aq 700 myń sharshy metrlik logıstıkalyq ortalyq qarastyrylǵan.
Ekinshi kezeńde 150 myń sharshy metr aýmaqta tońazytqysh qoımalary bar qoıma keshenin salý josparlanǵan.
Onyń aıtýynsha, bul ınfraqurylym taýar jetkizý tizbegin ońtaılandyryp, eki el arasyndaǵy saýda aınalymyn arttyrýǵa múmkindik beredi.
Joba «Qorǵas» qazaqstandyq bóliginiń damýyna jańa serpin beredi dep kútiledi. Qazirgi ýaqytta bul aımaq ınfraqurylymdyq damý deńgeıi boıynsha Qytaı jaǵyna qaraǵanda áldeqaıda artta qalyp otyr.
Investıtsııalyq kompanııa «Haınan Gýanlan Inhýeı»-diń bas dırektory Hý Peıınniń aıtýynsha, jobanyń jalpy ınvestıtsııa kólemi 587 mln AQSh dollaryn quraıdy.
— Bul joba óńirler men provıntsııalar arasyndaǵy taýarlardy tikeleı tanystyrýǵa múmkindik berip, ishki óndiristiń damýyna úlken jol ashady. Sonymen qatar Qazaqstan bıýdjetine túsetin salyq kólemin eki esege arttyrady dep oılaımyn, — dedi ol.
Aıta keteıik, keshenniń qurylysy 2027 jyldyń sońyna deıin aıaqtalady dep josparlanyp otyr.
Osyǵan deıin senator Súıindik Aldashev «Qorǵas» shekara mańy klasteriniń jumysyndaǵy problemalar týraly pikir bildirdi.
