Qorǵasta qaýipsizdikti qamtamasyz etýge arnalǵan bóget salynady

ASTANA. QazAqparat - Parlament Senatynyń jalpy otyrysynda «QR Úkimeti men QHR Úkimeti arasyndaǵy Qorǵas ózeninde «Shúkirbulaq (Almaly)» birlesken sel ustaıtyn bógetin salýdaǵy yntymaqtastyq týraly kelisimdi ratıfıkatsııalaý týraly» zańy qabyldandy, dep habarlaıdy QazAqparat.

Qorǵas - úlken transshekaralyq ózen. Bul eki úlken memlekettiń arasyndaǵy shekarany aıqyndaıdy, onyń ústine minezi bar ózen. Onyń tek qana Qazaqstan jaǵyndaǵy bóliginde úlkendi-kishili kólder bar. Osy kólder kóktemgi sý tasqyny kezinde eki jaqqa da birdeı qaýip tóndirýi ábden múmkin. Ekinshiden, «Qorǵas» - Qazaqstandaǵy úlken keden beketi. Budan asa aýqymdy kólemde júk tasymaly ótedi. Úshinshiden, keden beketiniń túbinde halyqaralyq mańyzy bar aýqymdy qurǵaq port dúnıege kelip otyr. Osy sebepterge baılanysty «Qorǵas» ózeni kóktemde eki jaqqa qaýip tóndirmeýi úshin memleketter arasynda tıisti kelisimge qol qoıylǵan», - dep atap ótti Muhtar Qul-Muhamed.

Atap aıtqanda, «Qorǵas» ózenindegi «Shúkirbulaq» bógetiniń qurylysyn Qazaqstan men Qytaı birlesip qarjylandyrady. Ótken jyldyń maýsym aıynda bizdiń Úkimet pen Qytaı Úkimeti arasynda «Qorǵas» ózeninde «Shúkirbulaq» bógetin birlesip salýǵa arnalǵan kelisimge qol qoıyldy. Atalǵan bóget «Qorǵas» halyqaralyq ortalyǵynyń qaýipsizdigin qamtamasyz etý úshin qajet. Sebebi ortalyq óte joǵary sel men tasqyn qaýpi bar aýmaqta ornalasqan.

Belgili bolǵandaı, qurylystyń jalpy smetalyq quny 11,7 mlrd teńge. Buǵan kerekti qarajat 2018-2020 jyldarǵa arnalǵan respýblıkalyq bıýdjette qaralǵan.