Qorǵasta ıesiz jatqan «altyn ıneler» tabyldy
ASTANA. QazAqparat - Qorǵas shekara jasaǵynyń aýmaǵyndaǵy Halyqaralyq shekara boıy yntymaqtastyǵy ortalyǵyn sholyp júrip, shekarashylar Qazaqstanǵa qaraı shyǵa beriste jalpy salmaǵy 45 kg-ǵa jýyq ıesiz zattar taýyp alǵan, dep habarlaıdy QazAqparat QR UQK ShQ baspasóz qyzmetine silteme jasap.
Bul joly tabylǵan zattar ádettegideı dári-dármek emes, biraq qytaı em-domyna kerek-jaraq dúnıeler eken. Atap aıtqanda - ystyq balaýyz, sonymen birge, «altyn ıneler». Júktiń 10 kg-ǵa jýyǵy bas jýatyn sabynsýlar bolyp shyqty.
Tabylǵan zattar aktilenip, Altynkól keden beketine tapsyryldy.
Sondaı-aq Petropavl shekara jasaǵynyń «Qaraqoǵa-avto» ótkizý bólimshesinde 2003 jyly shyǵarylǵan «Sýbarý Legası» avtokóligimen Reseıden kele jatqan 1987 jylǵy qazaqstandyq ustaldy. Buǵan sebep - avtokóliktiń urlanǵandyǵynan habar beretin belgiler. Dálirek aıtsaq, shanaq nómiriniń tirkeý týraly kýálikte kórsetilgen málimettermen sáıkes kelmeýi. Ustalǵan azamat avtokóligimen birge M. Jumabaev aýdanynyń polıtsııa bólimine tapsyryldy.
