Qorǵasta adam óltirgen kúdikti janjaldyń neden shyqqanyn aıtty

Kúdiktiniń sózinshe, ol marqum bolǵan Qýanysh Tólegenovten birneshe márte qysym kórgen. 4-5 ret aqsha talap etken jáne Dıas aqshasyn aparyp berip otyrǵan eken. Tipti Qýanysh odan «Aıfon 5s» uıaly telefonyn óziniń anasyna syılaımyn dep alyp alǵan. Sondaı-aq sot protsesinde  aıyptalýshy 4 maýsymda bolǵan janjaldyń ne sebepten shyqqanyn aıtty.

«Maǵan: «sóz túsinbeısiń be», - dedi Qýanysh. Ne bolyp qaldy «bratan» dep edim, ol turdy da aıtty: «Men saǵan aıttym ǵoı, Aıdaǵa yrbyńdama dep». Sosyn men oǵan: «Men oǵan yrbyńdaǵan joqpyn, bilip alsańshy» dep edim, ishimnen eki-úsh ret urdy. Qolynan ustap alyp, jibermeı qoıyp edim, ol da doldanyp ketti me, qolymnan jetektep, dalaǵa shyǵardy», deıdi kúdikti sotta bergen jaýabynda.
 

Sondaı-aq, Dıas artynsha Qýanysh jáne taǵy bir jigit ózin jabylyp urǵanyn aıtty. Ol sol sátte eseńgirep qalǵanyn jetkizdi. Al Qýanyshtyń júrek tusyna pyshaqty qalaı tyǵyp alǵanyn túsinbeı qalǵanyn aıtady. Kúdiktiniń sózinshe, onyń shaǵyn sómkesinde ylǵı da pyshaq júredi eken. Sebebi, júkterdi ary-beri tasymaldaǵanda pyshaq jipterdi «kesý úshin» kerek  bolatyn kórinedi. Tipti sol kúni qaıtys bolǵan Qýanyshtyń da sómkesinde pyshaqtyń bolǵanyn prokýror sot protsessinde aıtty. Protsess barysynda «Qorǵas»  ShYHO baqylaýshysy bolyp qyzmet isteıtin Aıda da keldi. Ol óz sózinde  Dıaspen sózge kelispegen jaǵdaıdyń bolǵanyn aıtty. Sebebi, Dıas bir márte ótetin jerden birneshe márte ótip, qyzmetkerlerden eskertý alǵanǵa uqsaıdy. Biraq, Aıda bul jaıly  Qýanyshqa aıtpaǵanyn jetkizdi. Іstiń osynshama nasyrǵa shabýyna ne sebep bolǵanyn bilmeıtinin túsindirdi. Atalǵan is Almaty oblysynyń qylmystyq ister jónindegi mamandandyrylǵan aýdanaralyq sotynda qaralýda.
 

Esterińizge sala keteıik, bıyl maýsymnyń tórtinde bolǵan qandy oqıǵaǵa baılanysty Panfılov aýdanynyń turǵyny D. Káripjanov aıyptalyp otyr. 22 jastaǵy kúdikti QR QK 99-baby 1-tarmaǵy, ıaǵnı «Adam óltirý» faktisi boıynsha aıyptalýda. Ol óziniń tanysy Q. Tólegenovpen ózara sózge kelispeı, onyń keýde tusyna pyshaq suǵyp alǵan. 25 jastaǵy azamat alǵan jaraqatynan keıin Jarkenttegi aýrýhanaǵa jetpesten kóz jumdy. Qandy oqıǵa Almaty oblysyndaǵy «Qorǵas» shekara mańy yntymaqtastyq halyqaralyq ortalyǵynyń aýmaǵynda boldy. Adam óltirý oqıǵasy beınebaqylaý kamerasyna túsip qalǵan bolatyn.