Qorǵasta 7 mlrd teńgege jýyq salyq pen kedendik tólem tólengen

ASTANA. KAZINFORM – Jetisýda «Qorǵas» arnaıy ekonomıkalyq aımaǵynda 32 joba iske asyrylyp, 2 myńnan astam jumys orny ashyldy. Bul týraly oblys ákimi Beıbit Isabaev aıtyp berdi. 

Іske asyrylǵan negizgi jobalar ishinde KTZE – Khorgos Gateway qurǵaq portyn keńeıtý jumystary aıaqtaldy, sonyń nátıjesinde termınaldyń ótkizý qabileti 1,5 esege artty, ıaǵnı jylyna 540 myńnan 800 myń konteınerge deıin ótkize alady. Sol sııaqty kún panelderin óndiretin «Miami Solar», metall konstrýktsııalaryn shyǵaratyn «Standart Steel KZ» zaýyttar da bar. 

Arnaıy ekonomıkalyq aımaqta taǵy 32 joba júzege asyrylyp jatyr, olardyń ishinde «ENVISION» jel qondyrǵylary men energııa saqtaý júıeleri zaýytynyń, MacCoffee kofelik jáne shaı sýsyndary zaýytynyń, «SkyHansa» halyqaralyq áýejaıynyń qurylysyn atap ótýge bolady. 

– «Qorǵas» ShYHA jumys tıimdiligin arttyrý úshin jańǵyrtý júrgizilip, ekinshi bagaj termınaly iske qosyldy, Face ID júıesi engizildi, memlekettik organdardyń aqparattyq júıelerimen ıntegratsııalandy. Sondaı-aq «Qazposhtamen» júk tasymaldaý baǵytynda jumys bastaldy. Sonyń nátıjesinde ortalyqqa kelýshiler sany táýligine 2 esege, ıaǵnı, 5 myń adamǵa deıin artty, - dedi B. Isabaev Ortalyq kommýnıkatsııalar qyzmetinde ótken baspasóz máslıhatynda.

2024 jyly munda 3,6 mlrd teńge salyq pen kedendik tólemder tólendi, bul 2023 jylmen salystyrǵanda 46 ese kóp. 

2025 jyldyń 10 aıynda 6,9 mlrd teńge tústi, ótken jylǵy kezeńmen salystyrǵanda 2,7 ese ósti. 

Oblys ákiminiń aıtýynsha, «Nur joly» beketiniń ótkizý qabiletin arttyrý úshin iri kólikterge arnalǵan 2,4 shaqyrymdyq aınalma jol salyndy. Oǵan qosa, jeńil avtokólikterdi «Qorǵas» arqyly baǵyttaý josparlanǵan. Bul kólik legin qosymsha azaıtýǵa jáne «Nur joly» beketiniń ótkizý qabiletin 30-40%-ǵa arttyrýǵa múmkindik beredi.

Aıta keteıik, Jetisý oblysynda bıylǵy 10 aıda barlyq sala boıynsha ósim baıqalady. Óńirde 27 jańa óndiris ashylyp, myń jarym jumys orny quryldy.