Qorǵasqa kún saıyn qansha týrıst keledi

ASTANA. KAZINFORM — «Qorǵas» shekara mańyndaǵy halyqaralyq yntymaqtastyq ortalyǵyna kún saıyn 4 myńnan astam qazaqstandyq, 13 myńnan astam qytaılyq aıaq basady. Qorǵas qazir jaı ǵana saýda aımaǵy emes, zamanaýı mádenı-oıyn-saýyq jáne saýyqtyrý klasterine aınalǵan. Munda iskerlik, shopıng jáne medıtsınalyq týrızm belsendi damyp keledi.

Ortalyq aýmaǵynda «Qytaı mádenı ortalyǵy» jumys isteıdi. Onda saýda, ınvestıtsııalar jáne ekijaqty týrızmdi damytý máseleleri jóninde halyqaralyq kezdesýler ótedi.
Ǵımarattyń birinshi qabatynda Qytaı tarıhynyń erte jáne ortaǵasyrlyq kezeńine jatatyn sırek artefaktiler ornatylǵan.

Týrıster bul qytaıdyń halyq emshilerinen qalǵan ádistememen jumys isteıtin saýyqtyrý ortalyǵyna, 9D formatyndaǵy zamanaýı kınoteatrǵa bara alady.

— Eger buryn Qorǵas tek saýdamen baılanysty bolsa, búginde medıtsınalyq týrızm baǵyty belsendi damyp keledi. Sheteldik qonaqtardyń qyzyǵýshylyǵy artyp keledi, — deıdi «Jetisý» týrıstik aqparat ortalyǵy basshysynyń orynbasary Meırambek Qapasov.

Ortalyqtyń málimetinshe, jyl basynan beri Jetisý oblysyna 2 mıllıonnan astam týrıst kelgen, onyń 76% -y sheteldikter.

Bıyl «Altynemel» ulttyq parkiniń ózine ǵana 30 myńǵa jýyq qonaq kelgen. Onyń arasynda Qytaıdan shyqqan 5 myńnan astam týrıst bar.

— «Qorǵas» aýmaǵynda týrızm qarqyndy damyp keledi. Kún saıyn Qazaqstan jaǵynan 4 myńǵa deıin keledi. Ortalyqtyń Qytaıǵa qaraıtyn jaǵynda 4,5 myńnan astam dúken jumys isteıtin saýda jelisi bar, — dedi «Qorǵas» HShYO ınvestıtsııalar departamenti basshysynyń orynbasary Damır Amanbaev.

Byltyr Jetisý oblysy men Shyńjań-Uıǵyr avtonomııalyq aýdany «Qorǵas» transshekaralyq týrıstik aımaǵyn qurý týraly memorandýmǵa qol qoıdy.

Buǵan deıin Qorǵastaǵy shekara syzyǵynyń ózgerýi selden qorǵaıtyn nysannyń qurylysyn keshiktirgenin jazǵan edik.