Qorǵasyn, mys, myrysh, marganets, hrom: jyl saıyn 14,3 mln tonna ken shetelge satylady
ASTANA. KAZINFORM – Ónerkásip jáne qurylys mınıstrligi Kazinform saýalyna joldaǵan jaýapta taý-ken jáne metallýrgııa salasyndaǵy shıkizat eksportynyń kólemi týraly málimet berdi.
Máseleniń máni
Májilis depýtaty Azat Perýashev Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı men Ónerkásip jáne qurylys mınıstri Ersaıyn Naǵaspaevqa «Qazaqmys» sııaqty paıdaly qazba óndiretin kompanııalardyń syrtqa shyǵaryp júrgen keni men kontsentrattary hımııalyq taldaýsyz ketip jatqany týraly málimetke túsinikteme berýdi talap etip, saýal joldaǵan bolatyn.
— Aqpan aıynda áleýmettik jelide «Qazaqmys» korporatsııasynyń burynǵy zerthana mamanynyń aqparaty shyqty. Aıtýynsha, korporatsııa tonna-tonna mys kontsentraty men kendi hımııalyq taldaý júrgizbesten, quramyndaǵy baǵaly jáne sırek metaldardy jasyra otyryp syrtqa shyǵarady. Mamannyń pikirinshe, osy arqyly kompanııa syrtqa shyǵarylyp jatqan resýrstardyń baǵasyn qoldan tómendetip, olıgarhtardyń paıdasy úshin el ekonomıkasyna shyǵyn keltirip jatyr. Taǵy bir suhbatta geologııa salasynyń sarapshysy taý-ken alpaýyty ondaǵan jyldar boıy ken men kontsentrattyń taldaýyn júrgizbesten, sheteldegi óndiriske sırek metaldyń shıkizatyn shyǵaryp kelgen. Atalǵan materıaldardyń siltemesin depýtattyq saýalmen birge joldaımyz, – degen Azat Perýashev.
Ónerkásip mınıstrligindegiler ne deıdi?
- Qazaqstan Respýblıkasy Keden Odaǵyna (qazir Eýrazııalyq ekonomıkalyq odaqqa) kirgen sátke deıin el aýmaǵynan ken eksportyna ruqsat berý qarastyrylmaǵan. 2009 jyldan bastap quramynda altyny bar shıkizatty eksporttaýǵa shekteýler qoıyldy. «Baǵaly metaldar men asyl tastar týraly» Zańnyń 8-baby 2-tarmaǵyna sáıkes quramynda baǵaly metaldar bar shıkizat taýarlaryn Qazaqstan aýmaǵynan áketýge nıeti bar tulǵa ýákiletti organ aıqyndaǵan tártippen, ýákiletti organ bekitetin tizbedegi baǵaly metaldardy óndirýdiń barlyq sýbektilerinen tıisti bas tartýdy nemese osyndaı bas tartýdyń bar ekeni týraly ýákiletti organnyń rastamasyn alýǵa mindetti, - dep jazylǵan mınıstrlik jaýabynda.
Resmı málimet ne deıdi?
- Taý-ken jáne metallýrgııa keshenindegi shıkizat eksportynyń kólemi negizinen kontsentrattarǵa tıesili, - delingen resmı jaýapta.
2024 jyly eksporttalǵan kontsentrattardyń ishinde kómirtektenbegen temir kontsentrattary – 5,7 mln tonna (2023 jylǵydan 9,4% az), aglomeratsııalanǵan temir kontsentrattary – 4,8 mln tonna (2023 jylǵydan 2,4% az), mys kontsentrattary – 1,8 mln tonna (2023 jylǵydan 5,6% az), marganets kontsentrattary – 214,4 myń tonna (2023 jylǵydan 36,3% kóp), qorǵasyn kontsentrattary – 45,7 myń tonna (2023 jylǵydan 18% az), myrysh kontsentrattary – 431,1 myń tonna (2023 jylǵydan 15,9% az), hrom kontsentrattary – 294,2 myń tonna (2023 jylǵydan 24,7% az), sazbalshyq (glınozem) – 997,9 myń tonna (2023 jylǵydan 14,3% kóp).
Eske salsaq, Kazinform tilshisi Qazaqstanda sırek kezdesetin metaldardyń qansha qory baryn, álemde onyń róli nesimen mańyzdy ekenin zerdelep shyqqan bolatyn.