«Qorǵas» jáne «Alashankoý» shekaralyq toraptaryn jańǵyrtý boıynsha kelisimder jasaldy
ASTANA. KAZINFORM – Qazaqstan Respýblıkasynyń Saýda jáne ıntegratsııa mınıstri Arman Shaqqalıev Qytaıǵa resmı sapary barysynda Shyńjań-Uıǵyr avtonomııalyq aýdanynyń (ShUAA) partııa komıtetiniń hatshysy Chen Sıaotszıanmen kezdesti. Bul týraly Saýda jáne ıntegratsııa mınıstrligi habarlady.
Kezdesý barysynda ShUAA Qazaqstan men Qytaı arasyndaǵy qatynastarda mańyzdy ról atqaratyny aıtyldy. Bul óńir eki el arasyndaǵy negizgi qurlyqtyq kópir sanalady jáne ózara saýdanyń aıtarlyqtaı bóligin qamtamasyz etedi. 2025 jyldyń qorytyndysy boıynsha Qazaqstan men ShUAA arasyndaǵy taýar aınalymy shamamen 18,9 mlrd AQSh dollaryn qurady.
Qytaı tarapynan ShUAA-nyń áleýmettik-ekonomıkalyq damýynyń qazirgi qarqyny týraly aqparat berilip, óńirdiń turaqty ósýi, syrtqy ekonomıkalyq baılanystarynyń keńeıýi jáne ınfraqurylymnyń jańartylýy atap ótildi. Sonymen qatar, ShUAA Qazaqstanmen shekaralyq yntymaqtastyq pen tranzıttik torap retindegi rólin kúsheıtip kele jatqany aıtyldy.
Basqosýda kólik-logıstıkalyq ınfraqurylymdy damytý máselelerine basa nazar aýdaryldy. Taraptar ótkizý pýnktteriniń ótkizý qabiletin arttyrý, temirjol baǵyttaryn jańǵyrtý jáne ınfraqurylymdyq jobalardy úılestirý boıynsha sharalardy talqylady. «Dostyq–Moıynty» ótkizý pýnktin keńeıtý, «Aıagóz–Tachen» temirjol ótkelin salý, sondaı-aq «Qorǵas» jáne «Alashankoý» shekaralyq toraptaryn damytý jobalarynyń mańyzdylyǵy atap ótildi. Ótkizý qabiletin arttyrý jáne ınfraqurylymdyq shekteýlerdi joıý qajettigi de erekshe kórsetildi.
Sonymen qatar «Qorǵas» halyqaralyq shekara mańy yntymaqtastyǵy ortalyǵyn damytýǵa, onyń ınfraqurylymyn jańǵyrtýǵa jáne saýda men ınvestıtsııa múmkindikterin keńeıtýge nazar aýdaryldy. Logıstıka, energetıka, týrızm jáne shekara mańy saýdasyn damytý basym baǵyttar retinde belgilendi.
Taraptar Qazaqstannyń «Qytaı–Eýrazııa» halyqaralyq EKSPO kórmesine belsendi qatysýy týraly kelisimge keldi. Qazaqstan bul kórmege qurmetti qonaq retinde qatysady. Іs-shara 2025 jyldyń 25–29 maýsym aralyǵynda ótedi jáne óńirdegi saýda-ekonomıkalyq yntymaqtastyqty damytýǵa, eksportty ilgeriletýge jáne Eýrazııa elderi arasyndaǵy iskerlik baılanystardy nyǵaıtýǵa baǵyttalǵan negizgi halyqaralyq alańdardyń biri bolyp tabylady.
Sondaı-aq Qazaqstan shekara mańy óńirleriniń delegatsııalarynyń Úlken Altaıdyń ekinshi halyqaralyq konferentsııasyna qatysýǵa qyzyǵýshylyq tanytty.
Mınıstrdiń aıtýynsha, Shyńjań óńiri shekaralyq jáne tranzıttik ózara is-qımyl júıesindegi negizgi býyn sanalady. Óńir arqyly taýar aǵyndarynyń basym bóligi ótedi, bul ony saýda, logıstıka jáne ónerkásiptik kooperatsııany damytýdaǵy Qazaqstannyń mańyzdy áriptesine aınaldyrady.
Arman Shaqqalıev Qytaı tarapyn Qazaqstanda bıylǵy jyly ótetin Óńiraralyq yntymaqtastyq forýmy men Shekara mańy óńirleriniń dostyq dıalogyna qatysýǵa shaqyrdy.
Kezdesýde saýdany ártaraptandyrý, onyń ishinde joǵary qosylǵan quny bar ónimderdiń úlesin arttyrý, agroónerkásiptik eksportty damytý jáne birlesken óndiristerdi iske qosý máseleleri de talqylandy. Taraptar yntymaqtastyqty ınfraqurylymdyq, ınvestıtsııalyq jáne ónerkásiptik jobalardy qosa alǵanda, odan ári tereńdetýge daıyn ekendikterin rastady.
Mınıstr ShUAA-men ózara is-qımyldy damytý Qazaqstannyń turaqty saýda baǵyttaryn qalyptastyrý jáne eldiń Qytaı, Ortalyq Azııa men Eýropa arasyndaǵy tranzıttik-logıstıkalyq hab retindegi rólin nyǵaıtý strategııasynyń mańyzdy quramdas bóligi ekenin atap ótti.
Budan buryn qytaılyq bloger Tao Mınsıý ІІ dárejeli «Dostyq» ordenimen marapattalǵanyn habarladyq.
