«Qorǵas» UQT-nyń izdeýde júrgen «kassırleri» men belsendi músheleri Qyrǵyzstanda qolǵa tústi
ASTANA. QazAqparat - «Qorǵas» uıymdasqan qylmystyq qaýymdastyǵynyń izdeýde júrgen «kassırleri» men belsendi músheleri ustaldy, dep habarlady QR Ekonomıkalyq jáne sybaılas jemqorlyqqa qarsy kúres agenttiginiń baspasóz qyzmetinen.
Vedomstvonyń aqparatyna qaraǵanda, 2013 jylǵy qyrkúıekte Qarjy polıtsııasy agenttiginiń suraýy boıynsha Túrik Respýblıkasynyń quqyq qorǵaý organdarymen «Qorǵas» jáne «Qaljat» kedendik beketterinde ekonomıkalyq kontarbandany júzege asyrǵan uıymdasqan qylmystyq toptyń «kassırleriniń» biri Dáýren Tólebaev Ystambul qalasynda ustaldy. Qazir ol qamaýda, ony Qazaqstanǵa ekstradıtsııalaý boıynsha is-sharalar qabyldanýda.
Al 2014 jylǵy 30 qańtarda Qarjy polıtsııasy agenttiginiń suraýy boıynsha Qyrǵyz Respýblıkasynyń ІІM qyzmetkerleri jedel-izdestirý sharalaryn júzege asyryp, «Qorǵastyq» uıymdasqan qylmystyq qaýymdastyqtyń belsendi músheleri Erlan Málibaev men Týrsýnmagamet Bogaevty ustady. Tergeý materıaldaryna sáıkes Málibaev qylmystyq qaýymdastyqta keden shekarasy arqyly kontrabandalyq ótkizý úshin kásipkerlerden zańsyz alym jınaýǵa jaýapty bolǵan. Ustaý kezinde Málibaevta Qyrǵyz Respýblıkasy azamatynyń jalǵan qujattary tabylǵandyqtan, oǵan qatysty osy elde qylmystyq is tergelýde. T.Bogaev aǵymdaǵy jylǵy 14 naýryzda qarjy polıtsııasy qyzmetkerlerimen Qazaqstan Respýblıkasyna ekstradıtsııalandy.
«2013 jylǵy 21 qazanda Almaty qalasynda uıymdasqan qylmystyq qaýymdastyqtyń múshesi, Almaty qalasynyń Kedendik baqylaý departamentiniń «Almaty» kedendik rásimdeý ortalyǵynyń burynǵy bastyǵy Marat Pirinbekov ustaldy. 2014 jylǵy 20 naýryzda Shyǵys Qazaqstan oblysynda qylmystyq qaýymdastyqtyń júkterdi alyp júrý tobyna kirgen Alık Qaıyrbaev qolǵa tústi», - delingen habarlamada.
Búgingi kúni Bogaev, Qaıyrbaev jáne Pirinbekov Almaty qalasy men Almaty oblysynyń Qylmystyq atqarý júıesi departamentiniń tergeý abaqtysynda, jaqyn ýaqytta olar da sotqa tapsyrylatyn bolady. «Qorǵastyq» uıymdasqan qylmystyq qaýymdastyqtyń taǵy 13 múshesi izdeýde.
