Qorǵas týraly Qytaımen úkimetaralyq kelisimge ózgeris enedi

ASTANA. KAZINFORM – Ónerkásip jáne qurylys vıtse-mınıstri Iran Sharhan Úkimette Qorǵas transshekaralyq óńirindegi ınjenerlik ınfraqurylym týraly baıandady.

Onyń aıtýynsha, Qorǵas transshekaralyq óńirinde eki negizgi arnaıy ekonomıkalyq aımaq jumys isteıdi. Olar: «Qorǵas – Shyǵys qaqpasy» jáne «Qorǵas» Halyqaralyq shekara mańy yntymaqtastyq ortalyǵy.

— «Qorǵas – Shyǵys qaqpasy» saýda logıstıka men óndiristi damytýǵa arnalǵan. Ol bıyl júk áýejaıyn salý maqsatynda 840 gektarǵa keńeıtildi. Aımaqtyń negizgi bóligi ınjenerlik ınfraqurylymmen qamtylǵan. Biraq rezervtik ýchaskeleri áli daıyn emes. Sondyqtan ákimdik jobalyq smetalyq qujattamany ázirleý jáne bekitý jumystaryn jedeldetý qajet, - dedi I.Sharhan.

Al «Qorǵas» HShYO» Qytaımen úkimetaralyq kelisim aıasynda jumys isteıdi jáne 2018 jyldan beri arnaıy ekonomıkalyq aımaq bolyp sanalady.

— Búginde Qytaımen shekaralas saýdany odan ári damytý maqsatynda atalǵan úkimetaralyq kelisimge ózgerister engizý pysyqtalyp jatyr. Bul ózgerister aımaqty ulǵaıtyp, qosymsha ótkizý pýnktin ashýdy jáne ony táýlik boıy jumys isteý rejımine kóshirýdi kózdeıdi. Qazir aımaqqa gaz qubyryn tartý jumystary aıaqtalyp qaldy, - dedi Ónerkásip vıtse-mınıstri.

Saýda mınıstriniń aıtýynsha, «Qorǵas» halyqaralyq shekara mańy yntymaqtastyq ortalyǵy AEA aýmaǵynda jalpy somasy 234,4 mıllıard teńge bolatyn 41 joba iske asyrylyp jatyr. Onyń ishinde 17 mıllıard teńgege segiz joba paıdalanýǵa berildi. 2027 jylǵa deıin 33 joba aıaqtalady.

Aıta keteıik, Qazaqstanda 2030 jylǵa deıin 5 transshekaralyq hab ashylady.