«Qorǵas - Shyǵys qaqpasy» jobasyna bólingen qarajat tolyq ıgerildi
ASTANA. QazAqparat - «Qorǵas - Shyǵys qaqpasy» arnaıy ekonomıkalyq aımaǵyna bólingen 36,8 mlrd. teńge qarajat tolyq ıgerildi. Bul týraly búgin Parlament Májilisinde ındýstrıaldyq jobalardyń qurylysyn baqylaý komıssııasynyń otyrysynda «Samuryq-Qazyna» AQ atqarýshy dırektory Nurlan Rahmetov málim etti, dep habarlaıdy QazAqparat.
«Respýblıkalyq bıýdjetten atalmysh jobany júzege asyrýǵa 36,8 mlrd. teńge bólingen jáne olardyń barlyǵy ınfraqurylym qurylysyna baǵyttaldy. Qurlyqtyq port QTJ kompanııasynyń qarajaty esebinen qarjylandyryldy. Arnaıy ekonomıkalyq aımaqtyń ózi úsh bólikten turady - qurlyqtyq port, logıstıkalyq aımaq jáne ındýstrıaldy aımaq. Qazirgi ýaqytta «Qorǵas - Shyǵys qaqpasy» arnaıy ekonomıkalyq aımaǵyna bólingen 36,8 mlrd teńge qarajat tolyq ıgerildi», - dedi Nurlan Rahmetov.
Onyń sózine qaraǵanda, AEA ınfraqurylymynyń josparlanǵan barlyq 68 nysany paıdalanýǵa berildi.
«Bólingen 36,8 mlrd. teńgeniń tek 82,5 mln. teńgesi qazynada qalyp otyr. Ol arnaıy ekonomıkalyq aımaqtyń basqarýdyń aqparattyq júıesin qurýǵa baǵyttalady», - dep atap ótti ol.
«Samuryq-Qazyna» AQ atqarýshy dırektory bul jumystar bıyl qańtar-aqpan aılarynda aıaqtalatynyn aıtty.
