«Qorǵas - Shyǵys qaqpasy» tolyq qýatyna engende 10 myń jumys orny qamtamasyz etiledi
Bul týraly Májilistegi «Nur Otan» partııasy fraktsııasy janyndaǵy «Nurly jol» baǵdarlamasy boıynsha Ulttyq qordan bólingen qarajattyń tıimdi jumsalýyn baqylaý jónindegi komıssııanyń otyrysynda málim boldy. Onda «Nurly jol» baǵdarlamasynyń Atyraý oblysyndaǵy «Indýstrııalyq munaıhımııa ulttyq tehnoparki» arnaıy ekonomıkalyq aımaq aýmaǵyndaǵy ındýstrııalyq jobalar men «Qorǵas-Shyǵys qaqpasy» Arnaıy ekonomıkalyq aımaǵyna bólingen qarajattyń tıimdi ıgerilý máselesi talqylanǵan bolatyn.
«2014-2016 jyldary «Qorǵas-Shyǵys qaqpasy» arnaıy ekonomıkalyq aımaǵy jobasyn júzege asyrý kezeńinde jalpy somasy 83,3 mlrd teńge qarajat bólingen. Onyń ishinde 36,8 mlrd teńgesi respýblıkalyq bıýdjetten, 46,5 mlrd teńgesi «Qazaqstan temirjoly» AQ jeke qarajaty. Bulardyń basym bóligi aımaqtaǵy qurǵaq portty salýǵa jumsalýda. AEA tolyq qýatyna shyqqan 2020 jyly ondaǵy júkterdiń aınalymy jylyna 4,4 mln. tonnaǵa jetedi dep josparlanýda», - dedi «Samuryq-Qazyna» Ulttyq ál-aýqat qorynyń Úkimetpen ózara is-qımyl jónindegi Basqarýshy dırektory Nurlan Rahmetov.
Onyń aıtýynsha, jobany júzege asyrý qurylysyna 939 jumys kúshi qamtamasyz etiledi. Al nysan tolyq qýatyna engende 10 myńǵa tarta jumys kúshi qamtamasyz etiledi.
«AEA qurǵaq porttan, logıstıkalyq porttan jáne ındýstrııalyq aımaqtan turady. Qazirgi ýaqytta ınvestıtsııalyq-logıstıkalyq tolyqtyrý jumystary belsendi atqarylýda», - dedi N. Ahmetov.
Onyń aıtýynsha, AEA-qa respýblıkalyq bıýdjetten bólingen 36,8 mlrd teńgeniń birinshi transhy 2014 jyldyń aıaǵynda berilip, ol tolyǵymen ıgerilgen. Ekinshi transhy 2015 jyldyń 9 jeltoqsanynda operator qolyna tıgen. «Bastapqyda bul qarajatty ıgerý 2015 jylǵa josparlanǵan bolatyn. Alaıda jobalyq qujattamalardy ázirleý nátıjesi boıynsha birqatar túzetýler engizildi. Bul túzetýlerdiń uzaqqa sozylýyna oraı qarjylyq-ekonomıkalyq negizdeme 2015 jyldyń qarashasynda jasalyp, qarajatty ıgerý sodan keıingi kezeńde belsendi júrgizile bastady. Jalpy AEA jumysynyń 80 paıyzǵa jýyǵy oryndaldy», - dedi N. Rahmetov. Onyń aıtýynsha, qazirgi tańda AEA-taǵy negizgi 68 nysannyń 51-i tolyq aıaqtalǵan.
QazAqparat, Astana
