«Qorǵas» ShYHO: kelýshiler sany 1,8 mln-ǵa jetti
ASTANA. KAZINFORM — Sońǵy jyldarda «Qorǵas» ShYHO-da ınfraqurylymdy tsıfrlandyrý, avtomattandyrý jáne jańǵyrtýdyń keshendi is-sharalary júzege asyrylyp jatyr. Sonyń nátıjesinde atalǵan ortalyq týrızmdi, saýda men ınvestıtsııany damytýǵa baǵyttalǵan zamanaýı ınfraqurylymy bar tıimdi alańǵa aınaldy. Bul týraly Jetisý oblysy ákiminiń baspasóz qyzmeti málim etti.
«Qorǵas» ShYHO basqarma tóraǵasynyń orynbasary Seıilbek Sadyrbektiń aıtýynsha, munda barlyq basqarý jáne ótkizý jumystary tolyq tsıfrlandyrylyp, Face ID júıesi engizilgen.
— «Qorǵas» ShYHO-nyń basty ǵımaratyna kúrdeli jóndeý juymysy júrgizilip, oǵan kirýden bastap, taýardy berýge deıingi protsestiń bári tolyq tsıfrlandyryldy. QR kod arqyly onlaın bılet alý múmkindigi jasaldy. Osynyń nátıjesinde ortalyqtyń ótkizý qabileti aıtarlyqtaı ósti. Mysaly, 2024 jylmen salystyrǵanda byltyr kelýshiler sany 16 paıyzǵa artty. Buǵan deıin biz 4-5 myń adam ǵana qabyldasaq, qazir 9 myń adamǵa deıin qabyldaý múmkindigimiz bar. Bıyl budan da kóp týrıst keledi dep kútýdemiz, — deıdi S. Sadyrbek.
Sonymen qatar ekinshi bagaj termınaly, júk tasymaldaý boıynsha «Qazposhta» servısi iske qosyldy. Sonyń arqasynda taýar tasymaldaý jeńildegen. Máselen, buǵan deıin taýar tasymaly 4-5 saǵatqa sozylsa, tsıfrlandyrýdyń arqasynda bul jumys 1-1,5 saǵatta atqarylatyn boldy.
Óz kezeginde turǵyndar qazir bekette keptelis azaıyp, jumys edáýir jeńildegenin aıtady. Máselen, Jarkent qalasynyń turǵyny Lılııa Jumahanova:
— Jumysyma baılanysty kúndelikti beket arqyly ótemin. Ár kelgen saıyn oń ózgeristerdi baıqaımyn. Buryn bekettegi uzyn-sonar kezek syrtqa deıin sozylatyn. Qazir burynǵydaı emes, tsıfrlandyrý arqyly kezek bir izge qoıyldy, ǵımarattyń ishi keńeıip, jańartyldy, — dedi ol.
Jarkent qalasynyń taǵy bir turǵyny Madııar Qurmanbaev:
— Buryn biz bılet alý úshin beketke arnaıy kelip, kezekke turatynbyz. Ol turǵyndarǵa aıtarlyqtaı qıyndyq týǵyzatyn. Qazir tsıfrlandyrýdyń arqasynda bıletti túrli bank jelileri arqyly onlaın alyp, beketten ońaı ótetin boldyq, — deıdi.
Qabyldanǵan sharalardyń nátıjesinde ortalyqqa kelýshiler sany 2023 jyly 966,9 myń bolsa, bul kórsetkish 2025 jyly 1,8 mln. adamǵa jetti.
Sóıtip, «Qorǵas» ShYHO ınfraqurylym men tsıfrlyq servısti, týrızm men elaralyq saýda-sattyqty damytýǵa yqpal etip otyr.