«Qorǵas — Shyǵys qaqpasy» arnaıy ekonomıkalyq aımaǵy quryldy

ASTANA. KAZINFORM — 2025 jylǵy 1 shildedegi Úkimet qaýlysymen «Qorǵas — Shyǵys qaqpasy» arnaıy ekonomıkalyq aımaǵy qurylyp, erejesi men nysanaly kórsetkishteri bekitildi. 

Arnaıy ekonomıkalyq aımaq Jetisý oblysynda ornalasqan. Jalpy aýdany 5431,5 gektar jer, onyń ishinde porttyq aımaq (áýe haby) — 840 gektar jer, logıstıkalyq aımaq — 483,4 gektar jáne ındýstrııalyq aımaq — 230,4 gektar jerdi alyp jatyr.

Arnaıy ekonomıkalyq aımaq zamanaýı óndiristi jedel damytý, ınvestıtsııa tartý, jańa tehnologııany engizý, tıimdi kólik-logıstıkalyq jáne ındýstrııalyq ortalyq qurý, sondaı-aq shekara mańy yntymaqtastyǵyn damytý maqsatynda qurylyp otyr.

Nysanaly kórsetkishterge sáıkes, 2030 jylǵa qaraı arnaıy ekonomıkalyq aımaqqa tartylatyn jalpy ınvestıtsııa kólemi 522,7 mlrd teńgege, al 2035 jylǵa qaraı 715,5 mlrd teńgege jetýi tıis. Sheteldik ınvestıtsııa kólemi 2030 jylǵa qaraı 10,2 mlrd teńgeni, 2035 jylǵa qaraı 15,5 mlrd teńgege jetedi dep josparlanyp otyr.

2030 jylǵa qaraı arnaıy ekonomıkalyq aımaqtyń qatysýshylarynyń sany 85 kompanııaǵa, 2035 jyly 95 kompanııaǵa deıin jetedi dep kútilip otyr. Sondaı-aq arnaıy ekonomıkalyq aımaq aýmaǵynda 2030 jyly 20,5 myńǵa deıin, al 2035 jyly 22 myńǵa deıin jumys orny ashylady. Óndiristegi Qazaqstannyń úlesi 2030 jyly 75%-ǵa deıin, al 2035 jyly 85%-ǵa deıin artady degen jospar bar.

Sondaı-aq qujatta aımaq aýmaǵyndaǵy qyzmettiń quqyqtyq rejımi, salyq salý, kedendik retteý tártibi men sharttary belgilengen.

Eske sala ketsek, 2024 jyly jekeniń qolynda ketken Qorǵastyń termınaly memleketke qaıtaryldy. 

Aıta keteıik, 30 maýsymda Memleket basshysy «Qazaqstan Respýblıkasynyń aýmaqtyq qorǵanysy týraly» zańyna qol qoıdy.