Qorǵas — Shyǵys qaqpasy: 11 ınvestor 10 mln teńgeden astam shyǵynǵa ushyrady
ASTANA. KAZINFORM — Jetisý oblysynyń prokýratýrasy Investorlardyń quqyqtaryn qorǵaý komıtetiniń úılestirýimen júrgizgen jumys nátıjesinde «Qorǵas — Shyǵys qaqpasy» arnaıy ekonomıkalyq aımaǵynyń basqarýshy kompanııasy men ınvestorlar arasyndaǵy sharttarda zańbuzýshylyqtar anyqtaldy. Bul týraly Prokýratýra málim etti.
Vedomstvonyń málimetinshe, 11 ınvestor 10 mln teńgeden astam mólsherde artyq shyǵynǵa ushyraǵan.
Prokýratýra organdary ınvestıtsııalyq jobalardy súıemeldeý jáne bıznes quqyqtaryn qorǵaý baǵytyndaǵy júıeli jumystardy jalǵastyrýda. Júrgizilgen taldaý nátıjesinde atalǵan AEA aýmaǵyn jáne ortaq paıdalanylatyn nysandardy basqarý, qyzmet kórsetý jáne kútip-ustaý jónindegi sharttar qoldanystaǵy zańnama talaptaryna sáıkes kelmeıtini anyqtaldy.
Atap aıtqanda, sharttarda Azamattyq kodeks normalaryna qaıshy keletin erejeler, sondaı-aq basqarýshy kompanııanyń qyzmetteri úshin komıssııany (syıaqyny) esepteý jáne tóleý tártibin qoldanýda buzýshylyqtar bolǵan. Keıbir talaptar zańda kózdelgen jeńildikterdiń qoldanylmaýyna ákelgen.
— Nátıjesinde 11 ınvestor komıssııa tóleý boıynsha jeńildikterdi paıdalanbaǵan, osyǵan baılanysty artyq tólengen soma 10 mln teńgeden asqan, — dep habarlady prokýatýradan.
Atalǵan faktiler boıynsha Jetisý oblysynyń prokýratýrasy basqarýshy kompanııanyń atyna zańdylyqtyń buzylýyn joıý týraly usyný engizdi. Ony qaraý qorytyndysy boıynsha qaıta esepteý júrgizilip, artyq tólengen qarajatty qaıtarý arqyly ınvestorlardyń quqyqtary qalpyna keltirildi.
Investorlardyń quqyqtaryn qorǵaý jumystary jalǵasady, al ınvestıtsııalyq saladaǵy zań buzýshylyqtar jedel túrde toqtatylatyn bolady.
Buǵan deıin «Qorǵas – Shyǵys qaqpasy» arnaıy ekonomıkalyq aımaǵynda ónerkásiptik óndiris pen kólik logıstıkasyn damytýǵa baǵyttalǵan ınvestıtsııalyq jobalar júıeli túrde júzege asyrylyp keledi. Búginde munda 65 joba iske asyrylyp, sonyń negizinde 4 myń jumys orny ashylady dep josparlanǵanyn jazdyq.
