Qorǵas pen júrgizýshi kýáligi: Qazaqstan men Qytaı qandaı kelisimderge keldi
ASTANA. KAZINFORM — 7 qyrkúıekte QR Іshki ister mınıstri Erjan Sadenov Beıjińge jumys saparymen baryp, «Ortalyq Azııa — Qytaı» formatyndaǵy ishki ister jáne qoǵamdyq qaýipsizdik mınıstrleriniń kezdesýine qatysty, dep habarlaıdy Polisia.kz.
Mınıstrler óńirlik qaýipsizdik, transulttyq uıymdasqan qylmysqa, esirtkiniń zańsyz aınalymyna, kıberqylmysqa jáne basqa da qazirgi zamanǵy qaterlerge qarsy is-qımyl máselelerin talqylady.
Sapar aıasynda Erjan Sadenov Qytaı Halyq Respýblıkasynyń qoǵamdyq qaýipsizdik mınıstri Van Sıaohýnmen ekijaqty kezdesý ótkizdi. Taraptar Qazaqstan-Qytaı arasyndaǵy qaýipsizdik salasyndaǵy yntymaqtastyqtyń ózekti máseleleri men birlesken jumystyń aldaǵy baǵyttaryn talqylady.
— Ekijaqty kezdesý nátıjesiniń biri — Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasynda «Qorǵas» halyqaralyq shekara mańy yntymaqtastyǵy ortalyǵynyń aýmaǵynda qaýipsizdik pen quqyqtyq tártipti qamtamasyz etý týraly kelisimge qol qoıylýy. Qujatqa qol qoıý arqyly «Qorǵas» halyqaralyq shekara mańy yntymaqtastyǵy ortalyǵy aýmaǵynda qaýipsizdikti qamtamasyz etýdiń quqyqtyq tetikterin qalyptastyrý boıynsha uzaq ýaqyt júrgizilgen birlesken jumys aıaqtaldy. Kelisim eki eldiń quzyretti organdarynyń ózara is-qımyl tártibin aıqyndaıdy. Bul quqyq buzýshylyqtardyń aldyn alýǵa, týyndaıtyn qaterlerge jedel den qoıýǵa jáne halyqaralyq ortalyq aýmaǵynda azamattardyń qaýipsizdigin qamtamasyz etýge múmkindik beredi, — delingen habarlamada.
Vedomstvonyń málimetinshe, ekijaqty kelissózderdiń taǵy bir nátıjesi — Qazaqstan men Qytaı azamattarynyń ulttyq júrgizýshi kýálikterin ózara taný jáne almasý jóninde ýaǵdalastyqqa qol jetkizilýi. Bul eki el azamattary úshin tıisti rásimderdi jeńildetip, ózara saparlarǵa qolaıly jaǵdaı jasaýǵa múmkindik beredi. Qol jetkizilgen ýaǵdalastyqtar Qazaqstan men Qytaıdyń qaýipsizdik salasyndaǵy yntymaqtastyǵyn odan ári damytýǵa jáne ortaq máselelerdi sheshýge baǵyttalǵan.
Buǵan deıin Erjan Sadenov mektepterdegi býllıngti erte anyqtaý tásilderi bekitilgenin aıtty.
