Qorǵas qurǵaq porty japon jýrnalısterin tańǵaldyrdy
BEIJІŃ. QazAqparat - «Kyodo News» japon aqparat agenttiginiń Qytaıdaǵy bas bıýrosynyń tilshisi Tatsýmı Tomodjı Azııadaǵy ózara yqpaldastyq jáne senim sharalary jónindegi keńesiniń (AÓSShK) úkimettik emes forýmynyń ekinshi konferentsııasyndaǵy baıandamasyn Qorǵas qurǵaq portyna arnady, dep habarlaıdy «QazAqparat» HAA-nyń Qytaıdaǵy tilshisi.
«Bir jol, bir beldeý» baǵdarlamasy aıasynda júzege asyrylatyn QHR men Eýropa arasyndaǵy qurlyqaralyq kópir qurylysynyń Ortalyq Azııa úshin qanshalyqty mańyzdy ekendigin túsiný úshin biz óz tilshilerimizdi Qytaı jáne Qazaqstan arasyndaǵy shekara aýmaǵyna, naqtyraq aıtsaq, QR aýmaǵyndaǵy «Qorǵas - Shyǵys qaqpasy» qurǵaq portyna jiberdik», - dedi ol «Azııalyq qaýipsizdik tujyrymdamasyn, biryńǵaı taǵdyr qoǵamdastyǵy qurylysyn óristetý - Azıa qaýipsizdigin qamtamasyz etýde BAQ-tyń róli» atty dóńgelek ústel barysynda.
«Bul, - dedi ol, - óziniń atyna laıyq jazyq dala ortasynda ornalasqan qurǵaq port. Alaıda, ishki Ýhan jáne Chýntsın porttarymen salystyrǵanda, onda úlken ózen joq, bul kóptegen júk poıyzdary ótetin, taýar almasýǵa arnalǵan úlken konteınerlik tasymal bazasy».
«Bul aýdannyń kólemi shamamen 130 gektar jerdi qamtıtyndyǵy tańǵalarlyq, al kúndelikti júk tasymalynyń jıiligi 18 myń konteınerge jetedi. Jazyq dalada qazirgi ýaqytta qala salynyp jatyr jáne 2035 jylǵa qaraı turǵyndar sany 100 myń adamǵa jetedi degen boljam bar. Basqasha aıtqanda, «Jibek jolynyń ekonomıkalyq beldeýi» jobasynyń aıasynda jazyq dala adamdar buryn sońdy kóz aldaryna elestetip kórmegen ekonomıkalyq damýǵa múmkindik ashty», - dedi Tatsýmı Tomodjı.
Onyń aıtýynsha, «Qorǵas - Shyǵys qaqpasy» qurǵaq portynyń aldaǵy damýy Qazaqstannyń ekonomıkalyq damýyna yqpal etip, eldegi qoǵamdyq qaýipsizdiktiń nyǵaıýyna septigin tıgizedi. 
