Qorǵas keden beketinen zańsyz qarjy men temeki alyp ótpek bolǵandar quryqtaldy

ASTANA. QazAqparat - Tek 3 kúnde «Qorǵas HShYO» keden beketinde shetel valıýtasyn tasymaldaýdyń 4 faktisi jáne temekini tasymaldaýdyń 6 faktisi toqtatyldy. Bul týraly QazAqparatqa Jetisý oblysy boıynsha Memlekettik kirister departamentinen habarlady.

«Qorǵas HShYO» keden beketinde jeke tulǵalardyń qolma-qol shetel valıýtasyn deklaratsııalamaý faktilerin anyqtaý boıynsha turaqty jumys júrgizilýde. Kedendik baqylaýdy júrgizý kezinde shekaralyq baqylaý qyzmetkerlerimen birlesip, QR-dan QHR-ǵa shyǵý kezinde shetel valıýtasyn alyp ótýdiń 4 faktisiniń joly kesildi.

17 mamyrda QHR azamatynan 20 000 AQSh dollary somasynda deklaratsııalanbaǵan qarajat anyqtaldy.

Sol sııaqty, 18 mamyrda 10 000 AQSh dollaryna jáne 270 000 teńgege deklaratsııalanbaǵan qarajat somasymen Qazaqstan Respýblıkasynyń azamaty toqtatyldy, QR basqa azamatynan júk dóńgeleginiń bagaj bóliginde 6 mln teńge jasyrylǵan paket tabyldy.

Kelesi kúni «Qorǵas HShYO» keden beketiniń jolaýshylar termınalynyń zalynda respýblıka aýmaǵynan ketý kezinde Qazaqstan azamaty 11 065 000 teńgemen ustaldy.

Odan bólek, dál osy keden beketinde kedendik baqylaý júrgizý kezinde shekaralyq baqylaý jáne polıtsııa qyzmetkerlerimen birlesip, QR-ǵa kirgen kezde temeki tasymaldaýǵa tyrysýdyń 6 faktisi anyqtaldy.

18 mamyrda Qazaqstan aýmaǵyna ákelý kezinde eki jaǵdaıda QR azamattarynan 52 jáne 12 blok mólsherinde «Mılano» markaly temeki ónimderi tabyldy jáne tárkilendi. 19 mamyrda avtokólik turaǵynda «ORIS» ıesiz temekiniń 60 blogy tabyldy.

20 mamyrda Qazaqstan aýmaǵyna ákelý kezinde úsh jaǵdaıda «Mılano» markaly temekiniń 35 blogy, «ORIS» temekisiniń 100 blogy, túrli markaly temekiniń 691 blogy tabylyp, tárkilendi.

Barlyq faktiler boıynsha ákimshilik materıaldar toltyrylyp, kináliler ákimshilik jaýapkershilikke tartyldy.