«Qorǵas» keden beketi arqyly ótetin kólikter sany bıyl 2 eseden astam ulǵaıdy
/strong>Mamyrdyń 26-sy. QazAqparat /Ádilet Musahaev/ - Kedendik odaqtyń qurylýy daǵdarystan keıingi ekonomıkalyq qatynastardyń qaıta jandanýyna óz áserin tıgize bastady. Keden oryndary aǵymdaǵy jyldyń 5 aıynda kedendik tólemder josparyn 114 paıyzǵa oryndady.
El qazynasyna josparlanǵan 15 mıllıard 294 mıllıon teńgeniń ornyna 18 mıllıard 294 mıllıon teńge tústi. Sonyń nátıjesinde 42,8 mıllıard teńgeni quraıtyn jyldyq jospar qazirgi kezde 43 paıyzǵa oryndalyp otyr. Bul baǵyttaǵy is-sharalardy júzege asyrýǵa Almaty oblystyq Kedendik baqylaý basqarmasy óz úlesin qosyp otyr. Basqarma bastyǵy Qurmanbek Artyqbaevtyń aıtýynsha 5 aıda Almaty oblysynyń úlesi eksportta - 10,4 paıyz, ımportta - 89,6 paıyz boldy. Al syrtqy saýda aınalymynyń jalpy kólemi 692 mıllıon AQSh dollaryn quraýda. Máselen «Qorǵas» keden beketi arqyly jyl basynan beri 8713 júk kóligi ótti. Bul ótken jyldyń sáıkes merziminen 3500 kólikke artyq.
«Qazir Keden odaǵyna kirý tóńireginde kóptegen suraqtar týyndap otyr. Meniń oıymsha, bul odaqqa kirý bizdiń saýda-sattyq qarym-qatynasymyzǵa keri áserin tıgizbeıdi. Óıtkeni búgingi kúni tólemder kóbeıip, Almaty oblysy boıynsha kórshi Qytaı elimen aradaǵy saýda-sattyq aınalymy 43 paıyzǵa jetip otyr, al respýblıka boıynsha 6 paıyzdyń tóńireginde. Keden odaǵyna kirgeli beri shet elden kólik tasymaldaý tólemderi 30-40 paıyzǵa ósip, azamattarymyzdyń avtokólik ákelý máselesi qıyndap ketken edi. Qazirgi tańda bul másele óz sheshimin taýyp, tólemder quny burynǵy qalpyna keltirildi», deıdi Q.Artyqbaev. Bul Úkimet basshysynyń reseılik áriptesterimen júrgizgen kelisiminen keıin júzege asty. Endi Qazaqstannyń árbir azamaty 2011 jyldyń 1-shi shildesine deıin jylyna bir ret shet elden 1 avtokólik ákele alatyn boldy.
Mamandardyń aıtýynsha, Keden odaǵy qurylǵaly beri keden qyzmetkerleriniń áleýmettik jaǵdaıyn kóterý kúrt jaqsardy. Bul kedendik tólemder men salyqtardyń qosymsha óndirilýine óz septigin tıgizýde. Máselen Almaty oblystyq keden basqarmasynyń derekterine qaraǵanda, olar 5 aıda kedendik tólemder men salyqtardan bıýdjetke qosymsha 100 mıllıon 938 myń 802 teńge kóleminde kiris kirgizdi. Sonymen qatar 270 ákimshilik is qozǵalyp, 4 mıllıon 701 myń 017 teńge kóleminde aıyppul óndirildi. Kedendik baqylaý basqarmasy tarapynan 62 qylmystyq is qozǵaldy. Onyń 5-i qaýipsizdik jelisi boıynsha bolsa, qalǵan 57-si kontrabandaǵa qarsy kúres basqarmasy quramyndaǵy anyqtaý bólimi qozǵaǵan qylmystyq ister.
«Kez kelgen memlekettik organ jumysyndaǵy basym baǵyttardyń biri sybaılas jemqorlyqqa qarsy kúres ekendigi belgili. Sondyqtan bizdiń basqarmada da jeke quram arasynda quqyq buzýshylyqtyń aldyn alýda birqatar is-sharalar jasalýda. Basqarma quramyndaǵy Іshki qaýipsizdik bólimi 42 qyzmettik tekserý júrgizip, onyń nátıjesi boıynsha 37 laýazymdy tulǵa tártiptik jaýapkershilikke tartyldy. Sondaı-aq, Basqarma qyzmetkerlerine qatysty qozǵalǵan 9 qylmystyq istiń beseýi ishki qaýipsizdik bólimi tarapynan qozǵalǵan edi. Maqsatty aldyn alý jumystaryn júzege asyrý nátıjesinde osy jyly basqarma qyzmetkerleri tarapynan sybaılas jemqorlyq sıpatyndaǵy quqyq buzyýshylyqqa jol berilgen joq», deıdi Almaty oblysy boıynsha Kedendik basqarmanyń bastyǵy Qurmanbek Artyqbaev.
«Qorǵas» Keden beketi bastyǵynyń orynbasary Rızabek Qalmajdarovtyń sózine qaraǵanda, Qytaıdan kelgen júk kóligi aldymen skanerleý apparatynan ótkiziledi jáne onda ne áketip bara jatqandyǵy tirkelip, elektrondy qulyp salynady. Keden beketinde júk tasymaldaýshylardyń málimeti boıynsha kólikti tekserý jumysy mejeli keden beketine jetken kezde ǵana júrgiziledi.Elektrondy qulypta kólik ıesiniń bergen málimeti boıynsha kólikte kim, ne alyp bara jatqandyǵy jáne ol ortalyq qyzmet kórsetý ortalyǵynda onlaın júıesi arqyly tirkelip, baqylanyp otyrady. Mysaly Qaraǵandy qalasyna baratyn júkti Atyraýǵa alyp ketýge bolmaıdy. Ol elektrondy chıp arqyly baqylanyp otyrady. Sonymen qatar elektrondy qulyp salynǵan júk kólikterin jol boıyndaǵy esh post toqtatpaıdy. Kólik mejeli orynǵa jetken kezde ǵana ondaǵy keden qyzmetkerleri elektrondy qulypty sheship, kólik júrgizýshisiniń bergen málimeti boıynsha ondaǵy zattardy tekseredi. Bul kásipkerlerdiń júk tasymaldaýǵa jumsalatyn ýaqytyn edáýir azaıtyp, jumysyn aıtarlyqtaı jeńildetip otyr.
