Qorǵas keden beketi arqyly júk aınalymy alty aıda 20 mln tonnadan asty

ASTANA. KAZINFORM – 2025 jyldyń birinshi jartyjyldyǵynda Qorǵas baqylaý-ótkizý beketi arqyly 20 mln tonnadan astam júk ımporttalyp, eksporttaldy, dep habarlaıdy Sınhýa aqparat agenttigi.

Qorǵas keden basqarmasynyń málimetinshe, 2025 jyldyń qańtar-maýsym aılarynda «Qorǵas» baqylaý-ótkizý beketi arqyly ımporttyq jáne eksporttyq júk kólemi ótken jyldyń sáıkes kezeńimen salystyrǵanda 4,3 paıyz artyp, 22,255 mln tonna boldy.

Qorǵas bul kórsetkish boıynsha Shyńjańdaǵy barlyq baqylaý-ótkizý beketi arasynda birinshi orynda tur.

Importtalatyn taýarlarǵa negizinen elektromehanıkalyq buıymdar, óńdelmegen mys men mys materıaldary, aýyl sharýashylyǵy ónimderi, azyq-túlik, metall keni, túpshaıma jáne t.b. jatady, olardyń ishinde ımporttyq azyq-túlik taýarlary saýda kóleminiń aıtarlyqtaı ósýi baıqaldy. Al eksporttyq taýarlardyń tizbektemesin negizinen jańa energııa kózderin paıdalanatyn avtomobılder, elektromehanıkalyq buıymdar, jańa jáne joǵary tehnologııa ónimderi, kıim, toqyma jáne t.b. qurady.

Qorǵas baqylaý-ótkizý beketi — Qazaqstan-Qytaı shekarasynda ornalasqan jáne birinshi dárejeli qurlyq porty. Qorǵas avtomobıl-temirjol ótkizý beketinde birqatar reformalyq sharalardy júzege asyrýdyń arqasynda kedendik resimdeý tıimdiligin arttyrý jalǵasyp otyr.

Osy jyldyń birinshi jartyjyldyǵynda Qorǵas temirjol beketi arqyly ımport pen eksport kólemi 6 mln 923 myń tonnaǵa jetip, ótken jyldyń osy kezeńimen salystyrǵanda 22 paıyzǵa artqan.

Buǵan deıin 2025 jylǵy 1 shildedegi Úkimet qaýlysymen «Qorǵas — Shyǵys qaqpasy» arnaıy ekonomıkalyq aımaǵy qurylyp, erejesi men nysanaly kórsetkishteri bekitilgenin jazǵan bolatynbyz.