«Qorǵas isi» boıynsha tárkilengen 2 páter 202 mln teńgege satyldy
ALMATY. QazAqparat - Almatyda jaýapqa tartylǵan memlekettik qyzmetkerlerdiń esebinen qala bıýdjetine 202 mln teńge túsken, dep habarlaıdy QazAqparat tilshisi.
2015 jyldan búginge deıin tárkilengen 7 páter qala menshigine ótken. Sonyń biri «Astana EKSPO-2017» Ulttyq kompanııasynyń» burynǵy basshysy Qajymurat Úsenovtyń «Mamyr-4» yqsham aýdanynda ornalasqan páteri tárkilenip, Almaty qalasy «Turǵyn úı jáne turǵyn úı ınspektsııasy basqarmasyna» berilgen.
Almaty qalasynyń Qarjy basqarmasynan QazAqparat tilshisi joldaǵan saýalǵa: «Tárkilengen jyljymaıtyn múlik memlekettik qorǵa qosylyp, úı kezeginde turǵandarǵa úlestiriledi. Eger mundaı obektilerdiń kólemi normadan asyp ketse, memlekettik organdarǵa áleýmettik jobalardy júzege asyrýǵa beriledi. Nemese ggosreest.kz elektrondy saýda alańynda aýktsıonǵa qoıylady»,-dep jaýap berdi.
Tárkilengen 7 páterdiń 2-ýi «Qorǵas isimen» aıypty bolǵan Baqytbek Qurmanǵalıevke tıesili. «Mıras» yqsham aýdanyndaǵy ornalasqan turǵyn úıler fızıkalyq tulǵaǵa 202 mln teńgege satylǵan. Odan túsken qarajat qalalyq qazynaǵa quıylǵan. Qazir atalǵan uıym QR UQQ Shekara qyzmeti basshysynyń orynbasary Alıma Hasenova men shekarashy Stanıslav Sheremetevterge tıesli múliktiń bóligin saýdaǵa salýmen aınalysýda.
Alıma Hasenovanyń aıaqtalmaǵan úıi «Almaty» ÁKK qaramaǵyna ótse, Stanıslav Sheremetevtyń Shashkına kóshesindegi páteriniń bóligi satylǵan.
Budan ózge, qalalyq qarjy basqarmasynda isti bolǵan burynǵy memqyzmetkerler Qurmanbek Artyqbaev, Danııar Ábdıev, Rashıd Esenjanovqa tıesili múlikti aqshaǵa aınaldyrý josparlanǵan.
