«Qorǵas isi» boıynsha halyqaralyq izdeýde bolǵan sońǵy kúdikti - B.Qaıyrbaev ustaldy
ASTANA. QazAqparat - Sybaılas jemqorlyqqa qarsy is-qımyl ulttyq bıýrosy Almaty oblysy aýmaǵynan «Qorǵas isi» boıynsha halyqaralyq izdeýde bolǵan sońǵy kúdikti Bekbolat Qaıyrbaevty ustady.
Bul týraly atalǵan vedomstvonyń baspasóz qyzmetinen habarlady.
Taratylǵan aqparatqa qaraǵanda, ol uıymdasqan qylmystyq toptyń jetekshisi T.Qaıyrbaevtyń týǵan baýyry. B.Qaıyrbaev uıymdasqan qylmystyq top múshelerine qatysty qylmystyq qýdalaýdy toqtatý maqsatynda quqyq qorǵaý organdaryndaǵy joǵary laýazymdy tulǵalardy satyp alý josparyn júzege asyrýda baılanystyrýshy býyn bolǵan.
Aǵasynyń tapsyrmasymen áreket etken ol, tanystary M.Zımanov, Ý.Áýbákirov, Qusmanov pen R.Júsipov arqyly laýazymdy tulǵalarǵa 3,2 mln. dollar para bergen. Olar óz kezeginde T.Qaıyrbaevty qylmystyq jaýapkershilikten bosatýy tıis bolǵan.
B.Qaıyrbaev 2012 jyldyń naýryzynan izdeýde bolǵan edi. Qazirgi ýaqytta ol Taldyqorǵan qalalyq ІІB-niń ýaqytsha oqshaýlaǵyshyna qamaldy.
Aıta keterligi, Sybaılas jemqorlyqqa qarsy is-qımyl ulttyq bıýrosy «Qorǵas isine» qatysy bar uıymdasqan qylmystyq toptyń izdeýde bolǵan barlyq múshelerin ustady.
