«Qorǵas isi» boıynsha aıyptalǵandar 5 jyldan 17 jylǵa deıin bas bostandyqtarynan aıyryldy
ALMATY. QazAqparat - Búgin Almatyda mamandandyrylǵan aýdanaralyq sottyń qylmystyq is boıynsha sýdıasy Sovethan Sákenov «Qorǵas» kedendik beketi arqyly qytaılyq taýarlardy jasyryn ótkizý áreketterine qatysty qylmystyq is boıynsha sot úkimin jarııalady.
Qylmystyq is boıynsha 45 adamǵa aıyp taǵylǵany belgili. Olardyń ishinde Ulttyq qaýipsizdik komıtetinde jáne kedendik organdarda jetekshilik qyzmetter atqarǵandar da boldy.
«Qorǵastyq uıymdasqan qylmystyq toptyń» jetekshisi Talǵat Qaıyrbaev 16 jylǵa bas bostandyǵynan aıyryldy. Ol endi jazasyn qatań tártiptegi kolonııada óteıtin bolady. Al onyń kómekshisi Baqyt Otarbaev 13 jylǵa bas bostandyǵynan aıyryldy. Ol da jazasyn qatań tártiptegi kolonııada óteıtin bolady. Bir aıta ketetin jáıt, prokýrorlar basty qylmyskerlerge 12 jyl berýdi suraǵan bolatyn.
«Qorǵas» kedendik beketiniń burynǵy bastyǵy Baqytjan Aıdarov endi aldaǵy 5,5 jylyn jalpy tártiptegi túzeý kolonııasynda ótkizetin bolady. Al Almaty oblysynyń kedendik baqylaý departamentiniń burynǵy basshysy Qurmanbek Artyqbaevqa qarsy qatań úkim shyǵaryldy - 14 jyl qatań tártiptegi kolonııa.
«Alataý-TsTO», ıaǵnı Alataý Ortalyq kedendik rásimdeý beketiniń burynǵy jetekshisi Mıhaıl Voıtovıch 8 jylǵa bas bostandyǵynan aıyryldy. Al «Qaljat» kedendik beketiniń bastyǵy Mındolla Úmbetqalıev 9 jylǵa sottaldy.
Ulttyq qaýipsizdik komıtetiniń Almaty oblysy boıynsha departamenti bastyǵynyń burynǵy orynbasary Baqytbek Qurmanálıev 16 jyldy arqalady. Onyń Ulttyq Qaýipsizdik komıtetindegi basqa áriptesteri Erlan Ábdirahmanov pen Talǵat Jaqaev aldaǵy 17 jyl ómirlerin qatań tártiptegi kolonııada ótkizetin bolady.
Sot joǵaryda atalǵan tulǵalardyń múlikterin tárkiledi jáne ár túrli merzimge syrtqy ekonomıkalyq salada kásipkerlikpen aınalysý jáne memlekettik qyzmette eńbek etý quqyǵynan aıyrdy. UQK men kedendik organdardyń burynǵy qyzmetkerleri áskerı jáne basqa da arnaıy ataqtarynan jurdaı boldy. Odan basqa, sotqa olarǵa qatysty memlekettik marapattarynan aıyrý týraly ótinish te engizildi.
Sottalǵandar uıymdasqan qylmystyq top quryp, Kedendik odaqtyń kedendik shekaralarynan asa iri kólemde ekonomıkalyq kontrabandalyq árekettermen aınalysqan. Qarjy polıtsııasy jáne ishki ister organdarynyń qyzmetkerlerine iri kólemde para bergen, ómirlerine qastandyq jasaýdy oılastyrǵan, sonymen qatar bılikti, ulttyq qaýipsizdik komıteti qyzmetkerleriniń qyzmettik babyn teris paıdalanǵan jáne ádeıi zańsyz joldarmen alynǵan múlikter jáne aqshalarmen qarjylyq operatsııalar jáne basqa da mámileler jasaǵan dep aıyptar taǵyldy.
Joǵarydaǵy uıymdasqan qylmystyq toptyń jasaǵan qylmystaryn tirkeýge sot óndirisine qylmystyq istiń 1576 tomy qajet boldy.
