«Qorǵas» halyqaralyq ortalyǵynyń jumysy toqtatyldy
TALDYQORǴAN. QazAqparat – Almaty oblysynda koronavırýs ınfektsııasynyń taralýyna jol bermeý baǵytynda qosymsha sharalar qabyldandy, dep habarlaıdy QazAqparat tilshisi.
«Qazaqstan Respýblıkasynda koronavırýs ınfektsııasynyń tirkelýi laboratorııalyq zertteýmen rastalýyna baılanysty jáne oblys aýmaǵynda ol vırýstyń taralýyna jol bermeý maqsatynda Almaty oblysynyń bas sanıtarlyq dárigeri Qaırat Baımuhambetov «Almaty oblysynda koronavırýs ınfektsııasynyń taralýyna jol bermeý boıynsha qosymsha sharalar qabyldaý týraly» qaýly qabyldady», - dep habarlaıdy oblys ákimdiginen.
Atalǵan qaýly eldiń tıisti zańnamasyna sáıkes jáne Densaýlyq saqtaý mınıstri men Almaty oblysynyń ákimimen bekitilgen «Qazaqstan Respýblıkasynda koronavırýs ınfektsııasynyń tirkelýi men taralýy kezindegi áreket algorıtmine» saı qabyldanǵany habarlanyp otyr.
«Qaýlyda 15 naýryzdan bastap oblystyń bas memlekettik sanıtarlyq dárigeriniń erekshe ókimi shyqqanǵa deıin «Qorǵas» shekara mańy yntymaqtastyǵy halyqaralyq ortalyǵynyń jumysyn toqtatý týraly aıtylady. Sonymen qatar qaýlyǵa sáıkes óndiristiń barlyq nysanynda sanıtarlyq-dezınfektsııalyq rejim kúsheıtiledi. Halyq kóp ári uzaǵynan jınalatyn ǵımarattarda qoldy jýýǵa arnalǵan dezınfektsııalyq qurylǵylarmen birge arnaıy qurylǵylar (sanıtaızerler) ornatylady», - dep habarlaıdy oblys ákimdiginiń baspasóz qyzmetinen.
