«Qorǵas» halyqaralyq ortalyǵynyń qazaqstandyq bóliginde qurylys jumystary kesheýildeýde
Bul týraly búgin Almatyda 22-27 qazan kúnderi «Qorǵas» shekara mańy yntymaqtastyq halyqaralyq ortalyǵynda (ShMYHO) «Qorǵas arqyly Jibek joly boıymen» degen atpen tuńǵysh ret ótkeli otyrǵan Qazaqstan-Qytaı saýda jármeńkesi týraly baspasóz máslıhatynda aıtyldy.
«Qorǵas» halyqaralyq shekaralyq yntymaqtastyq ortalyǵy» AQ-nyń vıtse-prezıdenti Sákenǵalı Nurtazınniń aıtýynsha, «Qorǵas» ShMYHO-ny qurý týraly shekti kelisimge 2004 jyly qol qoıylyp, 2005 jyly Qytaımen «Qorǵas» ShMHYO» qyzmetin retteý týraly úkimetaralyq kelisim jasaldy. Al 2011 jyly «Qorǵas - Shyǵys qaqpasy» arnaıy ekonomıkalyq aımaǵy quryldy. «Qorǵas» ShMHYO» aýmaǵy 528 gektardy quraıdy. Onyń 185 gektary Qazaqstanǵa, 343 gektary Qytaıǵa tıesili.
«Búgingi kúnge deıin onyń qazaqstandyq bóligine bıýdjetten ákimshilik, tehnıkalyq ınfraqurylymǵa 1,5 mlrd. dollarǵa jýyq qarjy jumsaldy. Sondaı-aq 2,5 mlrd. dollarǵa jeke bıznes ınvestıtsııasy salyndy. Qazirgi tańda biz jeke ınvestıtsııa salý jaǵynan kesheýildep kele jatyrmyz. Qytaı jaǵynda qurlys belsendi júrip jatyr. Oǵan memlekettik qoldaý yqpal etýde. Onda jobaǵa jumsalatyn ınvestıtsııa memlekettik, jeke dep bólinbegen», - deıdi S.Nurtazın. Onyń sózine qaraǵanda, qazir ortalyqtyń qazaqstandyq bóliginiń tujyrymdamasyna ózgerister ázirlenýde. Óıtkeni qonaq úı men meımanhana sany bastapqyda eki jaqta birdeı bolady dep eseptelgen edi. Qazir oǵan qajettilik bolmaı tur. Sondyqtan aldaǵy ýaqytta onyń jańa jobasy usynylmaq.
