«Qorǵas» halyqaralyq ortalyǵynda «Bıznes termınaly» paıda bolady

ALMATY. QazAqparat – Qorǵas shekara mańy yntymaqtastyǵy halyqaralyq ortalyǵynda QR Syrtqy ister mınıstriniń orynbasary Almas Aıdarov, QR Qarjy mınıstriniń orynbasary Rýslan Eńsebaev, QR Mádenıet jáne sport mınıstriniń orynbasary Órken Bısaqaev, «Kazakh Invest» UK» AQ Basqarma tóraǵasy Baýyrjan Sartbaev jáne Almaty oblysy ákiminiń orynbasary Serik Turdalıev, sondaı-aq memlekettik organdar, qaýymdastyqtar ókilderiniń qatysýymen vedomstvoaralyq keńestiń keńeıtilgen jınalysy ótti, dep habarlaıdy QazAqparat tilshisi.

Jıyn arnaıy ekonomıkalyq aımaq aýmaǵyndaǵy obektilerdiń jumysy, ınfraqurylymynyń jaǵdaıymen tanysý, termınaldardyń kelýshiler men týrısterdi qabyldaýǵa daıyndyǵyn tekserý maqsatynda uıymdastyryldy.

Karantın kezeńinde júrgizilgen jóndeý jumystarynan bólek, qonaqtardyń nazaryna shekara mańy yntymaqtastyǵy halyqaralyq ortalyǵynda kelýshilerge qosymsha qolaıly jaǵdaı jasaý maqsatynda engizilip jatqan jańashyldyqtar tanystyryldy. Solardyń ishinde bılet rásimdeý men bagajdy berýdiń elektrondy formatyn, sondaı-aq paıdalanýǵa berilmek «Bıznes termınaldy» atap ótken jón. «Bıznes-termınal» arqyly kelýshilerge pasporttyq jáne kedendik baqylaýdy jalpyǵa belgilengen rejımde ótýge nemese qolaıly jaǵdaıda jedel tártipte ótý boıynsha tańdaý beriledi.

Aýmaqty aralaý aıaqtalǵan soń vedomstvoaralyq keńestiń keńeıtilgen otyrysy ótti.

«Qorǵas» shekara mańy yntymaqtastyǵy halyqaralyq ortalyǵyn qurǵannan bastap, úlken jumys atqaryldy, degenmen áli de talaı sharýa bar. Búgin bar máseleler men mindetterdi aıqyndaý, sondaı-aq birlesken maquldanǵan is-áreketterge kelý úshin jınaldyq», – dedi «Qorǵas» ShYHO Basqarma tóraǵasy Dinmuhamed Ábsattarov.

Ary qaraı jıyn barysynda qatysýshylarǵa «Qorǵas» ShYHO» AEA damý strategııasy tanystyryldy.Sonymen qatar baıandamashylar «Qorǵas» ShYHO» AEA ınfraqurylymy boıynsha aǵymdaǵy jaǵdaıy jáne tehnıkalyq jabdyqtalýy týraly habarlady.

Spıkerdiń málimetinshe, strategııa birinshi kezekte týrıstik jáne ınvestıtsııalyq ahýaldy jaqsartýǵa baǵyttalǵan, bul jaıt qyzmet jáne taýarlar eksportyn damytýǵa mýltıplıkatıvti áser beredi. Ekinshi kezekte strategııa «Qorǵas» ShYHO» AQ-tyń klıentke baǵdarlanǵan kompanııa retindegi qalyptasýyna mán berilgen, úshinshiden ınjenerlik ınfraqurylymǵa ekpin jasalǵan.

Jıynǵa qatysýshylar, óz kezeginde, atqarylyp jatqan jumystyń mańyzyn aıtyp, engizilip jatqan jańashyldyqtardyń ózektiligin atap ótti.

Otyrys qorytyndysy boıynsha Dinmuhamed Ábsattarov «Qorǵas» shekara mańy yntymaqtastyǵy halyqaralyq ortalyǵynda qurylǵan qolaıly jaǵdaılar onyń ary qaraıǵy keńeıýine jasalǵan bastapqy baza ekenin, ortalyq basshylyǵy jumysty ary qaraı jalǵastyratynyn aıtty.

«Barlyq áriptesterime alǵys bildirip, mindetterdiń bir bóligi iske asyp jatqanyn aıtqym keledi. Biz ınvestıtsııalardy qalaı tartýǵa bolatynyn keshendi kórip otyrmyz, elshilikter, saýda ókilderimen birlesip jumys istep, kómek berýdemiz. Otandyq damý ınstıtýttarymen kelisimsharttar jasaý josparda. Árkimniń jeke segmenti bar, olar seriktesterdi jáne sáıkesinshe ınvestordardy tarta alady», – dep atap ótti «Qorǵas» ShYHO Basqarma tóraǵasy.

Aıta keteıik, búginde ınvestıtsııalyq jobalarǵa 112,73 gektar bólingen, qoldaǵy bos aýdan – 22,56 gektardy quraıdy.

Budan bólek, Dinmuhamed Ábsattarov Qorǵas alańyn Shanhaı yntymaqtastyq uıymy syndy respýblıkalyq jáne halyqaralyq formattaǵy is-sharalardy ótkizýge paıdalanýdy usyndy.