Qorǵas beketindegi qylmysqa baılanysty taǵy bir is qozǵalyp, izdeý jarııalandy

 Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginde ótken brıfıng barysynda resmı ókili Murat Jumanbaı málim etti.

«Ekonomıkalyq qylmysqa jáne sybaılas jemqorlyqqa qarsy kúres agenttigi aldaý jáne senimge qııanat jasaý arqyly Qorǵas keden beketindegi qylmystary boıynsha qamaýǵa alynǵan tulǵalardan qylmystyq qýdalaýdy toqtatýǵa jáne olarǵa qoldanylǵan bultartpaý sharasyn ózgertýge yqpaldasqany úshin 5 mln. AQSh dollaryn aldy degen aıyppen ıÝsýpýv, Zımanov, Áýbákirovke jáne Qosmanovqa qatysty qylmystyq istiń tergelip jatqandyǵyn buryn habarlaǵan bolatynbyz. Aǵymdaǵy jyldyń 13 naýryzynda joǵaryda atalǵan tulǵalarǵa qatysty asa iri kólemde para berýge aıdap salý faktisi boıynsha qosymsha taǵy bir qylmystyq is qozǵaldy», - deıdi M. Jumanbaı.

Onyń aıtýynsha, bulardan bólek aǵymdaǵy jyldyń 29 naýryzda  atalǵan istiń aıasynda Talǵat Qaıyrbaevqa jáne onyń aǵasy Bekbolat Qaıyrbaevqa  qatysty asa iri kólemde para berý faktisi boıynsha qylmystyq is qozǵalǵan.

«Bekbolat Qaıyrbaevty qamaýǵa alý týraly sottyń sanktsııasymen izdeý jarııalandy. Qylmystyq is tergelýde», - dedi M. Jumanbaı.