Qorǵas beketi ashylǵan birinshi kúni shetelge káriptas apara jatqan qazaqstandyq ustaldy

ASTANA. QazAqparat - «Qorǵas» halyqaralyq shekara mańy yntymaqtastyǵy ortalyǵy» keden beketinde salmaǵy 336 gramm káriptasty kontrabandalyq jolmen kórshi elge alyp ketý faktisiniń joly kesildi. Bul týraly Jetisý oblysy boıynsha memlekettik kirister departamentine silteme jasap QazAqparat habarlaıdy.

«Qorǵas» halyqaralyq shekara mańy yntymaqtastyǵy ortalyǵy» ashylýynyń alǵashqy kúninde, ıaǵnı 2023 jyldyń 24 sáýirinde kedenshiler shekara qyzmetiniń jáne Jetisý oblysy boıynsha ekonomıkalyq tergeý departamenti qyzmetkerlerimen birlesip, avtokólikti tekserý kezinde Qazaqstannan Qytaıǵa bara jatqan QR azamaty M. tizgindegen avtokóliktiń bagajynan jalpy salmaǵy 336 gramm bolatyn 9 dana káriptastapty.

Qazirgi ýaqytta kontrabandalyq taýar asyl tasty jikteý jáne qundyq sıpattamalarynyń normatıvtik-tehnıkalyq qujattama talaptaryna sáıkestigin anyqtaý, kináli adamǵa túpkilikti sheshim shyǵarý úshin ortalyq keden zerthanasyna saraptamaǵa jiberildi.

Zerthana tárkilengen tastyń baǵaly tastar sanatyna jatatynyn rastaǵan jaǵdaıda kináli tulǵa QR ÁQBtK 545-babymen ákimshilik jaýapkershilikke tartylady.

Bul jaǵdaıda 15 AEK mólsherinde aıyppul tóleıdi, al taýar tárkilenýi múmkin.

Eger rastalmaǵan jaǵdaıdataýarlardy deklaratsııalamaǵany nemese jalǵan kedendik deklaratsııa jasaǵany úshin QR ÁQBtK 551-babymen ákimshilik jaýapkershilikke tartylady, jeke tulǵalarǵa 30 AEK mólsherinde aıyppul qarastyrylǵan.

Esterińizge sala keteıik, 2023 jyldyń 24 sáýirinen bastap úsh jyldyq qyzmetin toqtatqannan keıin «Qorǵas» keden beketi óz jumysyn qaıta bastady.

«Osyǵan baılanysty barlyq azamattar men «Qorǵas» HShYO» kelýshilerinen QR jáne EAEO keden zańnamasyn múltiksiz saqtaýdy suraımyz» dep eskertedi memkirister departamenti.