«Qorǵas» aýmaǵynda halyqaralyq poshta almasý bondtyq qoıma ashylady
TALDYQORǴAN. QazAqparat - «Qorǵas» shekara mańy yntymaqtastyǵy halyqaralyq ortalyǵynda poshta almasý bondtyq qoıma salynady. Bul týraly «Qazposhta» AQ basqarma tóraǵasy Sáken Sársenov óziniń Feısbýk paraqshasyna jazdy dep habarlaıdy QazAqparat tilshisi.
«Keshe «Qorǵas» ShYHO jáne «QZ SILK ROAD LOGISTICS» kompanııasynyń basshylyǵymen kezdestik. Kezdesý barysynda «Qorǵas» terrıtorııasynda jaı qurylysyn salý men ony bondtyq qoıma uıymdaryna jalǵa berý máselelerin qarastyrdyq. Jańa qoıma jáne HPAO (halyqaralyq poshta almasý orny) jumysyn kóktemge qaraı retteýdi josparlaýdamyz», - dedi «Qazposhta» basshysy.
Onyń jazýynsha, búginde tıisti qujattardy ázirleý jumystary bastaldy.
Sondaı-aq, S.Sársenov qoıma jumysshylarymen kezdesip, olardyń eńbek etý jaǵdaıyn jaqsartý josparda bar ekenin málim etti.
Aıta ketsek, atalǵan shekara mańy halyqaralyq ortalyǵy arqyly ústimizdegi jyldyń qańtar aıynda 90 tonna júk ótkizilgen. Ótken jyldyń qorytyndysy boıynsha júk almasý kórsetkishi 1 136 tonnany quraıdy.
