Qorǵanys vıtse-mınıstri keıbir protsesterdiń áli keńes zamanyndaǵy tásilmen júrgiziletinin moıyndady

NUR-SULTAN. QazAqparat – QR Qorǵanys mınıstriniń orynbasary Darhan Ahmedıev Qarýly kúshterdizamanaýı aqparattyq ınfraqurylymmen jabdyqtaýdaǵy problemalardy atady, dep habarlaıdy QazAqparat tilshisi.

«Qorǵanys mınıstrliginde ІT-mamandar tapshy. Ol da belgili. Negizi bul másele tek áskerge ǵana baılanysty emes. Naryqta da bul problemalar bar. ІT-mamandardyń tapshylyǵy joǵary. Bul – birinshi. Ekinshiden, bizdiń ІT-mamandar men naryqtaǵy ІT-mamandardyń aılyqtaryn salystyrsaq, olardyń jalaqysy bizdegilerden 3-4 ese úlken. Sondyqtan bizde jumys istep júrgen mamandar kelisimshart bitkennen keıin naryqqa ketip jatady. Bul da bir másele», - dedi mınıstrdiń orynbasary.

Sondaı-aq ol vedomstvonyń keıbir protsesteri áli keńes zamanyndaǵy tásilmen júrgiziletinin moıyndady.

«Odan bólek, tıimsiz bıznes-protsester keńinen taralǵan. Bul – keńes úkimetinde nemese budan 10-20 jyl buryn bolǵan protsester. Áli kúnge deıin sol kúıinde júrgiziledi. Eshteńe ózgermegen. Al endi azamattyq qoǵamǵa qarasaq, bizdiń kúndelikti minez-qulqymyz ózgergen. Mysaly, aýrýhanaǵa nemese bankke barý operatsııalary qazir múldem basqasha. Al Qarýly kúshterge kelsek, kóptegen protsester eski tásilde qalyp otyr», - dedi Darhan Ahmedıev.

Onyń málimeti boıynsha, jer-jerdegi áskerı bólimder qoldanystan shyǵyp qalǵan tehnıkany paıdalanýǵa májbúr.

«Kompıýterler, serverler, komýtatorlar kóbinese eskirgen. Muny da moıyndaýymyz kerek. Sońǵy úsh aıda onshaqty áskerı bólimdi aralap shyqtym. Solardyń ishinde 1-2 áskerı bólimde osydan 10-15 jyl buryn qoldanystan shyqqan. «Pentium III»-pen jumys istep otyr. Ol da bir úlken másele. Bul máselelerdi sheshý úshin aldymyzǵa naqty maqsattar qoıyp otyryz», - dedi vıtse-mınıstr.

Buǵan deıin Qorǵanys mınıstrligi qańtar oqıǵasynan keıin Qarýly kúshterdiń qolbasshylyq quramy neshe paıyz jańarǵanyn málim etken edi.