Qorǵanys vedomstvosynyń basshysy merekege qatysyp otyrǵan balalardyń kóbi halyq qadir tutatyn Otan qorǵaýshy mamandyǵyn tańdaıtyndyǵyna senim bildirdi
ASTANA. 24 jeltoqsan. QazAqparat - Qazaqstan Qorǵanys mınıstri Ádilbek Jaqsybekov Shoqan Ýálıhanov atyndaǵy Kadet korpýsy men armııa generaly Saǵadat Nurmaǵambetov atyndaǵy «Jas ulan» Respýblıkalyq mektebiniń tárbıelenýshilerin qabyldady, dep habarlady QR Qorǵanys mınıstrliginiń baspasóz qyzmeti.
Qorǵanys vedomstvosynyń basshysy ótip bara jatqan jyldyń nemen este qalǵanyn atap ótti.
- Bárimiz de osy jyldyń jarqyn ári mańyzdy oqıǵalarynyń kýágeri boldyq, - dedi Qorǵanys mınıstri Ádilbek Jaqsybekov. - Qazaqstan Respýblıkasynyń Prezıdenti Nursultan Nazarbaevtyń jáne barlyq qazaqstandyqtardyń eńbeginiń arqasynda elimizdiń gúldenýine taǵy bir qadam jasaldy. Jaqynda Astana qalasynda ótken EQYU Sammıti Qazaqstan men onyń kóshbasshysynyń dúnıejúzinde joǵary bedelge ıe bolǵandyǵynyń kýási boldy.
Qorǵanys vedomstvosynyń basshysy áskerı qyzmetshilerdiń jyl boıy óz jaýyngerlik sheberligin arttyryp, oqý-jattyǵýlar ótkizip jatqandyǵyn da atap ótti.
«Kadet korpýsy men «Jas ulan» Respýblıkalyq mektebiniń tárbıelenýshileri Qazaqstan armııasyn maqtan tutady. Qazir biz sany shaǵyn, utqyr, jaqsy tehnıkasy bar, kásibı armııany qurý jolyndamyz. Sol sebepti, armııada saýatty ofıtserler men sarbazdar qyzmet etýi kerek», - dedi Qorǵanys mınıstri.
Qorǵanys vedomstvosynyń basshysy tárbıelenýshilermen sóılesip, Kadet korpýsynyń oqý-jaýyngerlik tehnıkamen qamtamasyz etilgendigin, «Profı» jattyǵý keshenimen jaraqtanǵanyn atap ótti. Kadetter óz jattyǵý polıgonynda atý men kólik júrgizýmen aınalysady.
«Jas ulan» Respýblıkalyq mektebinde júzý basseıni ashyldy. Ulandar qazirgi zamanǵy mýltıservıstik aqparattandyrý jáne oqytý júıesi negizinde oqıdy.
El Prezıdenti - QR QK Joǵarǵy Bas qolbasshysy Nursultan Nazarbaevtyń úzdiksiz qamqorlyǵy arqasynda orta áskerı oqý oryndary ary qaraı ómir súrý, oqý men keleshek kásibı qyzmetin jetildirý úshin jalpy bilim beretin daıarlyq, áskerı bilimder negizderin alýǵa qajetti barlyq qural-jabdyqtarmen qamtamasyz etildi.
Búgingi tańda QR QM Kadet korpýsynyń on ekinshi, «Jas ulan» Respýblıkalyq mektebiniń toǵyzynshy túlekteri bitirip otyr. Mekteptiń birinshi túlekteri joǵary áskerı bilim alyp, Qazaqstan armııasynyń qatarynda ofıtserlik laýazymdarda abyroıly qyzmet atqaryp júr. Sondaı-aq, kadetter de osy qatardy tolyqtyryp, serjanttyq quramnyń komandalyq laýazymdaryna taǵaıyndaldy.
Qorǵanys vedomstvosynyń basshysy merekege qatysyp otyrǵan balalardyń kóbi, qıyn, biraq qurmetti jáne halyq qadir tutatyn Otan qorǵaýshy mamandyǵyn tańdaıtyndyǵyna senim bildirdi. Bolashaq áskerı qyzmetkerler jańa jyldyq syılyqtar aldy, al Qorǵanys vedomstvosynyń basshysy Ádilbek Jaqsybekov saltanatty túrde Aıaz ata jáne Aqshaqarmen birge jańa jyl shyrshasyn jaqty. Osy jerde dástúrli jaıdary qol ustasyp júrip án shyrqaý, bı bıleý jarystarymen ertegige saıahat bastaldy.
- Bárińizdi kele jatqan Jańa jylmen quttyqtaımyn! 2011 jyl boıy, kóńilderińiz osy meıram kúnderindegideı kóterińki, ári jaıdary bolsyn! - dep Qorǵanys mınıstri tárbıelenýshilerdi quttyqtady. - Densaýlyq, baqyt, jaqsy oqý tileımin! Sizder bizdiń keleshegimizsizder, Sizder óz isterińizdiń kásipqoıy, Otanynyń naǵyz patrıottary bolady dep senemin!
«Jas ulan» mektebinde ótken jańa jyldyq shyrshadan soń Qorǵanys mınıstri L.N. Gýmılev atyndaǵy Eýrazııa ulttyq ýnıversıteti janyndaǵy áskerı kafedranyń oqý-tárbıe úderisin uıymdastyrý jaǵdaıymen, oqý-materıaldyq bazasymen tanysty.
Ádilbek Jaqsybekov zamanaýı tehnıkalarymen jabdyqtalǵan oqý aýdıtorııalaryn aralap kórdi. Stýdentter mınıstrge qarýdy paıdalaný boıynsha meńgergen tájirıbelerin kórsetip, kafedranyń shaǵyn polıgonynda shaǵyn jattyǵý ótkizdi.
Oqý ornynyń jumysyna rızashylyǵyn bildirgen Qorǵanys mınıstri qazirgi ýaqytta Qazaqstan armııasyna jumyldyrý rezervin daıyndaýda áskerı kafedralar birden-bir oryn bolyp otyrǵany atap ótti. Onyń jarqyn mysaly retinde ashyq áńgime barysynda kóptegen stýdentterdiń Otanǵa qyzmet etýge ázir ekendigin aıtýǵa bolady.
