Qorǵanys salasynyń ókilderi óńirdegi qyzmetshilerdi Almatyǵa aýystyrý úshin para alǵan
«Bıyl Qorǵanys mınıstrligi salasynda jasalǵan sybaılas jemqorlyq qylmystardyń sany artqanyn atap ótken jón. Bul saladaǵy sybaılas jemqorlyqtyń kórinisi eń aldymen eldiń qorǵanys qabiletine áser etedi. Qorǵanys júıesinde oryn alǵan sybaılas jemqorlyq kórinisterine paraqorlyq pen bıýdjet qarajatyn urlaý jatady», - delingen agenttik aqparatynda.
Máselen, osy jyldyń 7 aıynda, 2019 jyldyń uqsas kezeńimen salystyrǵanda qylmystyq isterdiń sany 11-den 31-ge deıin, ıaǵnı úsh esege artty. Onyń ishinde 22 is sotqa jiberilip, jergilikti organdardyń 7 laýazymdy tulǵasy sottaldy. Aıtalyq ótken aptada ǵana Almaty qalalyq sybaılas jemqorlyqqa qarsy qyzmet jemqorlyq quqyq buzýshylyq jasady degen kúdikpen Áskerı ókildikter ortalyǵy Áýe qorǵanysy kúshteri baǵytynyń bastyǵyn, QR Qorǵanys mınıstrliginiń Kadrlar departamenti bastyǵynyń burynǵy orynbasaryn jáne Radıoelektronıka jáne baılanys áskerı-ınjenerlik ınstıtýty kýrsanttarynyń vzvod komandırin ustady.
«Olar júıeli túrde deldal ofıtserler arqyly áskerı qyzmetshilerdi basqa óńirlerden Almaty qalasynyń áskerı bólimderine aýystyrý boıynsha «kadrlyq bıznes» uıymdastyrdy degen kúdikke ilindi. Alynǵan zańsyz aqshalaı syıaqy somasy bir áskerı qyzmetshini aýystyrǵany úshin 800 myńnan 1,1 mln teńgege deıin ózgerip otyrǵan»,- dedi vedomstvodan.
