Qorǵanys salasyndaǵy qazaqstandyq ónimge suranys bolady - M.Altynbaev

ASTANA. Mamyrdyń 26-sy. QazAqparat /Aıdar Ospanalıev/ - «Qazaqstanda qorǵanys salasy boıynsha óndiriletin ónimderdi jaqsylap jolǵa qoıatyn bolsa, oǵan jaqsy suranys bolýy múmkin», deıdi Senat depýtaty Muhtar Altynbaev.

Bul pikirin ol búgin Astanada ótken «KADEX-2010» qarý-jaraq jáne áskerı-tehnıkalyq múlikter kórmesinde bildirdi, dep habarlaıdy QazAqparat.

Onyń paıymdaýynsha, elimizdiń qorǵanys salasy boıynsha ónim shyǵaratyn zaýyttar Keńes ókimeti tusynda qarqyndy jumys istep kelgen bolatyn. «Eger biz olardyń qyzmetin sol kezdegideı jolǵa qoıa bilsek, Reseı men Ýkraına sııaqty elderdiń zaýyttary bizdiń ónimderdi alýlary múmkin. Ony tek júzege asyra bilý kerek. Bul rette ásirese ǵarysh, avıatsııa salalaryn atap ótýge bolady. Biz qazirgi tańda frantsýzdarmen birlesip, baılanys salasy boıynsha qajetti ónim shyǵarýdy josparlap otyrmyz. Eger oılaǵan is sátti júzege assa, baılanys salasyndaǵy ónimderge de ózgeler suranys týdyrýy múmkin. Sebebi olardyń da qarý-jaraqtary eskirgen. Sondyqtan ásker salasyndaǵy Qazaqstannyń ónimderine ózgeler suranys týdyrady», dedi halyq qalaýlysy.