Qorǵanys mınıstrliginiń ushqyshtary janyp jatqan orman alqabyna 3500 tonnadan astam sý tókti

ASTANA. QazAqparat - Qarýly kúshterdiń áskerı qyzmetshileri Abaı oblysynda bolyp jatqan órtpen kúresti belsendi jalǵastyrýda, dep habarlaıdy QazAqparat.

QR Qorǵanys mınıstrliginiń baspasóz qyzmeti taratqan aqparattarǵa qaraǵanda, armııalyq avıatsııanyń ushqyshtary maýsymnyń 8-i men 13-i aralyǵynda janyp jatqan órtke 3500 tonnadan asa sý tókti.

Qalyptasqan jaǵdaıdy eskere otyryp, Qarýly kúshterdiń 600 áskerı qyzmetshisi men 50 tehnıka Shúlbi, Talıtsa, Ozerkı, Jernovka jáne Baryshevka ýchaskelerindegi tilsiz jaýmen kúreske tartylǵan.

Jaǵdaıdy áýeden baqylaý úshin úsh ushqyshsyz ushý apparaty qoldanylýda.

Tótenshe jaǵdaılar mınıstrliginiń órt sóndirýshi eseptoptary men «Shyǵys» óńirlik qolbasshylyǵynyń bólimshelerine armııalyq avıatsııa áýeden qoldaý kórsetýde. Іs-qımylyn «Shyǵys» óńirlik qolbasshylyǵy jedel shtabynyń 12 áskerı qyzmetshisi úılestirip otyratyn 3 arnaıy top jumys isteýde.

– Qoldanystaǵy normaǵa sáıkes ár ekıpajdyń aýysymy tórt saǵatqa sozylady. Osy ýaqyt ishinde tikushaqtar 30-35 ret sý tógedi. Bul orta eseppen 100 tonna sý, – degen statıstıkany keltirdi 30131 áskerı bólimi komandıriniń orynbasary podpolkovnık Rýslan ıÝmashev.

69 adamnan turatyn 23 ushý ekıpajy naqty jáne úılesimdi áreket etýde. Máselen tikushaqtan jeke dara sý tógý ádette tıimsiz. Bul bir oshaqqa úsh tonna ǵana sý degen sóz. Eger alty tikushaqpen ushsa bir maqsatta jumys isteıdi. Keıde 40 sekýndta bir jerge 30 tonna sý tógýge bolady.

Ushqyshtardan keıin TJM-niń jerdegi órt sóndirýshi eseptoptary jalyndy aýyzdyqtaýda. Olardyń sońyn ala Abaı garnızonynyń áskerı qyzmetshileri iske kirisedi. Áskerıler janyp jatqan aǵashtardy qulatyp, byqsyǵan otty óshirip jatyr. Jumys kúndiz-túni toqtamaı júrgizilýde.

Sondaı-aq áskerı qyzmetshilerdiń der kezinde tamaqtanýy men demalyp kúsh jınaýyna ýaqyt bólingen.

Aýqymdy apat aımaǵynda qarýly kúshterdiń barlyq bólimsheleriniń is-qımylyn úılestirýdi Qorǵanys mınıstri general-polkovnık Rýslan Jaqsylyqov júzege asyrýda.

Tótenshe jaǵdaılar mınıstrliginiń jedel shtabymen, jergilikti ákimshilikpen birlesip, ol órtke qarsy is-sharalarǵa qatysatyn jeke quramnyń mindetterin aıqyndaýda.