Qorǵanys mınıstrliginiń kóshpeli alqa otyrysy ótti

Kún tártibine sáıkes birinshi jartyjyldyqtaǵy jaýyngerlik jáne jedel ázirliktiń qorytyndysy shyǵaryldy. Áskerlerdiń daıyndyǵy jáne jaýyngerlik ázirlik sapasyn arttyrý máseleleri qarastyryldy. Qazaqstan áskeriniń qarý-jaraq jáne áskerı tehnıkasyn damytý tujyrymdamasy, sondaı-aq Qarýly Kúshter basshylyq quramynyń áskerı tártip pen quqyq tártibin qamtamasyz etý boıynsha jumystary talqylandy.

- Qarýly Kúshterdiń basym tapsyrmalarynyń biri - áskerlerdiń jedel jáne jaýyngerlik ázirlik kórsetkishin arttyrý, - dep atap ótti Qorǵanys mınıstri Ádilbek Jaqsybekov. - Elbasy - Qarýly Kúshterdiń Joǵarǵy Bas qolbasshysynyń bizge qoıyp otyrǵan talaby da osy.

Mınıstr Qazaqstan áskeri jaýyngerlik ázirlikte negizgi salmaqty jeke quramnyń daıyndyǵyna arnaıdy dep atap ótti. Biraq bul sandy arttyrý degen sóz emes. Qazaqstan áskerindegi daıyndyq sapalyq sıpatqa ıe bolýy kerek.

Búgingi tańda áskerler ártúrli áskerı qımyldar teatryndaǵy is-qımyldarmen oqytylýda. Jýyrda ǵana aıaqtalǵan «Shyǵys», «Qarataý» oqý-jattyǵýlary joǵary deńgeıde ótkenin atap ótken durys. Qazir mergender juby men arnaıy maqsattyǵy barlaý toptarynyń «Altyn úki» halyqaralyq jarysy ótýde.

Qarýly Kúshterdi tehnıkalyq jaraqtandyrý da jaýyngerlik ázirlikpen tyǵyz baılanysty.

Áskerı qyzmetshilerdi áleýmettik qamtamasyz etý máselesi de barynsha mańyzǵa ıe. Qazirgi ýaqytta «Áskerı qyzmet jáne áskerı qyzmetshilerdiń mártebesi týraly» zań jobasy jasalýda. Bul qujattyń negizgi maqsaty - áskerı qyzmetshilerdiń áleýmettik qamtamasyz etilý júıesin jetildirý. Áleýmettik qamtamasyz etý kólemi qyzmet jaǵdaıyna baılanysty bolady.

Alqa otyrysynda jumyldyrý kúshteriniń daıyndyǵy da kóterildi. Bul baǵytta osymen ekinshi jyl belsendi jumystar júrgizilip keledi.

- Memleket óziniń qaýipsizdigi maqsatynda jumyldyrý organynyń qalyptasqan júıesin ıelený kerek, - dedi mınıstr. - Jumyldyrý júıesi daǵdarys jaǵdaıynda Qarýly Kúshter qataryn daıyndalǵan mamandarmen tolyqtyrýǵa ázir bolýy qajet.

Qarýly Kúshterdiń basshylyq quramy serjanttar quramy jumysyn kúsheıtý jáne olardyń jaýapkershiligin arttyrý máselelerin de kóterdi. Serjanttar ofıtserler men jeke quramdy baılanystyryp turatyn býyn ekeni barshaǵa aıan. Ótken jyly qarasha aıynda, bıyl mamyr aıynda Gvardeısk garnızonynda Qarýly Kúshterdiń serjanttar quramymen nusqaýlyq-ádistemelik jıyndar ótkizildi. Jıynda basshylyq quram bul sekildi is-sharalardy turaqty túrde ótkizip turý týraly baılamǵa keldi.

Alqa otyrysynda áskerı qyzmetshilerdi medıtsınalyq qamtamasyz etý joǵary deńgeıde bolý kerektigi aıtyldy.

Qorǵanys mınıstrligi óz tarapynan Almaty, Astana qalalarynda zamanaýı medıtsınalyq keshender turǵyzýda.

Qazirgi tańda áskerı oqý oryndaryna kýrsanttar iriktelýde. Bul jerde medıtsınalyq komıssııa basty ról oınaýy kerek. Bul másele úsh aıdan soń bastalatyn áskerge shaqyrý kampanııasyna da qatysty.

- Búgin bizdiń qyzmetimizdi odan ári jetildire túseýge septigin tıgizetin áńgime boldy dep oılaımyn,- dedi Qorǵanys mınıstri. - Sizder jaýyngerlik oqý, áskerı tártip jaǵdaıy qarý-jaraq pen áskerı tehnıkanyń ázirligi, bir sózben aıtqanda Qarýly Kúshterdiń jaýyngerlik qabiletin aıqyndaıtyn sheshimder qabyldaıtyndaryńyzǵa senimdimin.

Alqa otyrysyn japqan Qorǵanys mınıstri Ádilbek Jaqsybekov árbir laýazymdy tulǵa ekinshi jartyjyldyqta Qarýly Kúshterdiń aldynda turǵan tapsyrmalardy sheshýge laıyqty úles qosa beretine senim bildirdi.