Qorǵanys mınıstrliginiń qaıyrymdylyq maqsatyndaǵy júgirý aktsııasyna 700-den astam adam qatysty (FOTO)
Qaıyrymdylyq sharasyna Qazaqstan Qarýly kúshterýiniń generaldary - general-leıtenanttar Murat Maıkeev, Oleg Bıjanov, Baqytjan Ertaev, general-maıorlar Talǵat Muhtarov, Muhamedjan Talastarmen birge, 700-den astam áskerı qyzmetshi qatysty. QR Qorǵanys mınıstrliginiń baspasóz qyzmeti habarlaǵandaı, áskerı shendi azamattarmen qatar, aktsııaǵa qoǵam qaıratkerleri, belgili óner adamdary men elordanyń qarapaıym halqy da qýana at salysqan. «Bul aıdy elimizdiń Qarýly Kúshteri qaıyrymdylyqqa arnady deýge ábden negiz bar. 1 qazannan bastap, «Qarttarym-qazynam!» degen rýhanı tárbıe beretin aktsııa bastalǵan bolatyn. 1 jeltoqsanǵa deıin jalǵasatyn shara aıasynda QR Qarýly kúshteriniń áskerı qyzmetshileri Astanadaǵy qarttar úılerin aralap, bir kún emes, turaqty túrde qarııalarǵa kómek kórsetedi, qamkóńil qarttardy qýantady. Astanada bastalǵan osy qaıyrymdy is ózge óńirlerdiń barlyǵynda jalǵasyn tapty»,-deıdi QR Qorǵanys mınıstriniń orynbasary, general-maıor Talǵat Muhtarov. Al, general-leıtenant B.Ertaev atap ótkendeı, qaıyrmydylyq júgirý aktsııasy áskerı qyzmetshilerdiń boıyndaǵy erlik pen jaýyngerlikti ǵana pash etip qoımaı, Otanǵa, halqyna degen qamqorlyq minezderin tanytyp otyr. «Áskerılerimiz osy shara arqyly ózderiniń naǵyz patrıot ekenin kórsetip otyr. Olar, jaýgershilikke ǵana emes, qaıyrymdylyqqa da daıyn. Mine, bul qazaq áskeriniń, áskerı qyzmetshilerdiń qandaı patrıot ekenin dáleldeıdi. Osy isteri arqyly áskerı adamdar jastarǵa qaıyrymdylyq sharalarynyń paıdasyn kórsetedi»,-dep atap ótti B.Ertaev. Qorǵanys mınıstrliginiń baspasóz qyzmeti habarlaǵandaı, búgingi qaıyrymdylyq júgirý aktsııasy «Áskerı dınastııa» atty birinshi respýblıkalyq konkýrs aıasynda uıymdastyrylǵan. Konkýrstyń arqasynda óte aýyr áskerı qyzmetke ǵumyrlaryn arnaǵan otbasylar anyqtalǵan. Osy jarys arqyly qazaqstandyqtar Qarýly kúshterde boryshyn ótegen, tipti, Uly Otan soǵysyna qatysqan ata-ájeleriniń, áke-shesheleriniń jolyn qýyp, búginde táýelsiz Qazaqstannyń shekarasy men tynyshtyǵyn kúzetip júrgen áskerı otbasylar týraly aqparat bildi»,-deıdi T.Muhtarov. Áskerı konkýrstyń qorytyndysy boıynsha, Otanyna 100 jyldan artyq adal eńbek sińirgen Ápeshevter otbasy jeńimpaz atandy. Konkýrstyń ekinshi ornyn Muhametqalıevterdiń áýleti, úshinshi ornyn Tanko áýleti jeńip aldy. Jalpy, búgingi qaıyrymdylyq maqsatyndaǵy júgirý aktsııasy Otan qorǵaýshylar alańynda ótti. Qaıyrymdylyq sharasyna qatysqan azamattar alańnyń aýmaǵyna ornatylǵan arnaıy jáshikterge aqsha salyp, sol arqyly densaýlyǵy nashar balalarǵa kómek kórsetti. Sebebi, búgingi shara barysynda jınalǵan qarajat túgeldeı «Balalarǵa ómir syılaı qory men «Mıloserdıe» qoǵamdyq qoryna aýdarylady.
