Qorǵanys mınıstrliginiń general-maıory 5 jylǵa sottaldy

NUR-SULTAN. QazAqparat - QR Qorǵanys mınıstrligi Kadr departamentiniń burynǵy bastyǵy general-maıor Qaırat Kópbaev para alǵany úshin sottaldy, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttiginiń Telegram-akkaýntynda jarııalanǵan aqparatqa sáıkes, general-maıorǵa qatysty qylmystyq isti tergeý aıaqtaldy.

«2019 jyldyń mamyr aıynda Kópbaevtyń Aqtóbe qalasyndaǵy «T.Bıgeldınov atyndaǵy Áýe qorǵanysy kúshteriniń Áskerı ınstıtýty» RMM-ǵa ofıtserlik laýazymǵa taǵaıyndaǵany úshin 200 myń teńge somasynda para alǵany anyqtaldy. Aqmola garnızony Áskerı sotynyń úkimimen Kópbaev memlekettik qyzmette ómir boıyna laýazym atqarý quqyǵynan jáne 5 jylǵa bas bostandyǵynan aıyryldy», - delingen vedomstvo málimetinde.

Sonymen birge, sot Qazaqstan Respýblıkasy Prezıdentiniń atyna Kópbaevty general-maıor áskerı ataǵynan jáne «Qurmet» ordeninen aıyrý týraly usynys engizgen.

Qorǵanys mınıstrliginiń general-maıory para aldy degen kúdikpen ustalǵanyn Sybaılas jemqorlyqqa qarsy is-qımyl agenttigi osy jyldyń 4 aqpanynda jarııalaǵan edi.

Keıinnen oǵan qatysty 2 aı merzimge úıqamaqta ustaý bultartpaý sharasy qoldanylǵan bolatyn.