Qorǵanys mınıstrliginiń alqa májilisi ótti
ASTANA. Qarashanyń 20-sy. QazAqparat /Qanat Mámetqazyuly/ ‑ Búgin QR Qorǵanys mınıstrliginde vedomstvo basshysy Ádilbek Jaqsybekovtyń tóraǵalyq etýimen alqa májilisi bolyp ótti,
dep habarlaıdy QazAqparat.
Jıyn barysynda 2009 jyldyń jalpy qorytyndylary shyǵarylyp, aldaǵy 2010 jylǵa qorǵanys salasynda jaýyngerlik daıyndyqty arttyrý jáne jaýyngerlik ázirliktiń sapasyn jaqsarta túsý máseleleri talqylandy. Qorǵanys mınıstri Á. Jaqsybekov alqa barysynda bıylǵy jyly Qazaqstan Qarýly Kúshteri birqatar joǵary deńgeıdegi keń kólemdi qoǵamdyq-saıası jáne jedel sharalardy atqarǵanyn atap ótti. «Bunyń ishinde eń aldymen bes memlekettiń basshylary qatysyp, joǵary baǵalaǵan jedel áreket etetin ujymdyq kúshterdiń komandalyq-shtabtyq «Ózara is-qımyl-2009» oqý-jattyǵýlaryn, táýelsiz Qazaqstan tarıhynda tuńǵysh ret Konstıtýtsııa kúni qurmetine arnalǵan áskerı paradty ataýǵa bolady», dedi mınıstr.
Mınıstrdiń sózine qaraǵanda, 2008 jyly Qazaqstan Qarýly Kúshterinde ártúrli deńgeıdegi 32 oqý-jattyǵý sharalary júzege asyrylsa, aǵymdaǵy 2009 jyly bul kórsetkishter aıtarlyqtaı ósip, jalpy sany 52 jattyǵý ótkizilgen. Qazirgi ýaqytta Shanhaı yntymaqtastyq uıymy sheńberinde Qazaqstanda ótetin keń kólemdi «Beıbitshilik mıssııasy» oqý-jattyǵý sharasyna daıyndyq jumystary júrgizilýde.
Sonymen birge, jıyn barysynda aǵymdaǵy jylǵy jaýyngerlik jarys jeńimpazdary men «Ózara is-qımyl-2009» oqý jattyǵýynda, sondaı-aq Konstıtýtsııa kúnine arnalǵan áskerı paradta kózge túsip, úzdik kóringen áskerı qyzmetshiler marapattaldy.
