Qorǵanys mınıstrliginiń aqparattyq-nasıhat toby jolǵa shyqty

ASTANA. 12 tamyz. QazAqparat - 2013 jylǵy 12-17 tamyz aralyǵynda Qazaqstan Respýblıkasy Qarýly Kúshteri Bas shtaby bastyǵynyń orynbasary - Tárbıe jáne ıdeologııalyq jumystar departamentiniń bastyǵy polkovnık Muhamedjan Talasovtyń basshylyǵymen Qorǵanys mınıstrliginiń keshendi aqparattyq-nasıhat toby Shymkent, Taraz qalalary men Arys, Jibek joly, Lýgovoı, Merke jáne Gvardeısk garnızondarynda bolady. Bul týraly QR Qorǵanys mınıstrliginiń baspasóz qyzmetinen habarlandy.

Atalǵan is-sharanyń maqsaty - Qarýly Kúshterdiń oń bedelin arttyrý jáne qoǵamda áskerı qyzmetti nasıhattaý, memlekettik jastar saıasaty tujyrymdamasyn iske asyrý sheńberinde jastarǵa áskerı-patrıottyq tárbıe berý júıesin jáne urpaq sabaqtastyǵy prıntsıpterin belsendirý, sondaı-aq áskerı ortada rýhanı mádenıet pen shyǵarmashylyq bastamany damytý bolyp tabylady.

Aqparattyq-nasıhat tobynyń quramynda buqaralyq aqparat quraldarynyń ókilderi men Qazaqstan Respýblıkasy Qorǵanys mınıstrligi Ortalyq ansambliniń ónerpazdary bar.