Qorǵanys mınıstrligine qarasty mekemede bıýdjet qarjysy urlanǵan

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi qorǵanys salasynda bıýdjet qarjysyn jymqyrý faktisin anyqtady, dep xabarlaıdy QazAqparat tilshisi.

Agenttiktiń resmı ókili Nurlan Jaxınniń aıtýynsha, QR Qorǵanys mınıstrliginiń Qaraǵandy oblysy boıynsha áskerlerdi jaıǵastyrý bas basqarmasynyń laýazymdy tulǵalary bıýdjet qarajatyn jymqyrǵan.

«Atap aıtqanda, óndiristik-texnıkalyq bólimniń basshysy bir aktsıonerlik qoǵamyna qarasty merdiger uıymynyń ókilderimen sóz baılasyp, Prıozersk qalasyndaǵy áskerı qalashyqta kúrdeli jóndeý jumystary boıynsha jalǵan aktilerdi rásimdegen. Sóıtip, 209 mln teńgeni ysyrap etken. Atalǵan soma qurylys-ekonomıkalyq sot saraptamasynyń qorytyndysy boıynsha anyqtaldy», - dedi N.Jaxın Astanada ótken baspasóz máslıxatynda.

Aıta keteıik, búgin agenttiktiń Túrkistan oblysy Ordabasy aýdanynyń ákimin paramen ustaý operatsııasyna qatysty vıdeony jarııalady.  Budan bólek, 2 mln teńgemen ustalǵan basqarma basshysynyń vıdeosy da kórsetildi. Al Shyǵys Qazaqstan oblysynda Memlekettik kirister departamentiniń ókilderi paramen ustaldy.