Qorǵanys mınıstrliginde áskerı qurylysshylarǵa qurmet kórsetildi

NUR-SULTAN. QazAqparat – Garnızondarda Qurylysshylar kúnine arnalǵan saltanatty sharalar ótti. Qorǵanys mınıstriniń orynbasary general-maıor Muhamedjan Talasov Almatyda Áskerı ınfraqurylym bas basqarmasynyń ardagerleri men áskerı qyzmetshilerin kásibı merekesimen quttyqtady, dep habarlaıdy QazAqparat vedomstvonyń baspasóz qyzmetine silteme jasap.

Ol áskerı qurylysshylardyń Qarýly kúshterdi damytýǵa jáne áskerlerdi udaıy jaýyngerlik ázirlikte ustaýǵa qosqan eleýli úlesin atap ótti.

«Táýelsizdik alǵanda Qarýly kúshterge Keńes Odaǵynyń áskerı qalashyqtary men garnızondarynyń ınfraqurylymy qaldy. Jeke quramnyń kúsh-jigeriniń arqasynda biz qolda bardy saqtap qana qoımaı, jańa nysandardy da saldyq. Qazir Memleket basshysy Qasym-Jomart Toqaevtyń tapsyrmalary aıasynda «Qaýipsiz el» ulttyq jobasy iske asyrylyp jatyr, áskerı-qurylys bólimsheleriniń ınjenerlik-tehnıkalyq áleýeti de iske qosylady», - dep atap ótti general-maıor Muhamedjan Talasov.

Búginde 19 aýdandyq paıdalaný bólimi men 6 jol-paıdalaný ýchaskesi bar Áskerı ınfraqurylym bas basqarmasy qolda bar qordy tııanaqty ustaýmen, qyzmet kórsetýmen, qurylys salýmen, kúrdeli jáne aǵymdaǵy jóndeýmen aınalysady.

1995 jyldan bastap áskerı-qurylys bólimsheleriniń kúshimen quramynda júzdegen ǵımarattar men qurylystar bar 30-dan astam jańa áskerı qalashyq pen keshen salynyp, paıdalanýǵa berildi. Nur-Sultanda Qorǵanys mınıstrliginiń ákimshilik ǵımaraty, Ulttyq qorǵanys ýnıversıtetiniń kesheni salyndy. Nur-Sultan, Shymkent, Taldyqorǵan jáne Balqash qalalaryndaǵy áýeaılaqtar kúrdeli jóndeýden ótip, paıdalanýǵa berildi. «Jetigen» áskerı áýeaılaǵyna jáne «Sary-Arqa» áýeaılaǵynyń áskerı sektoryna jóndeý júrgizilip jatyr.

Qarýly kúshterdiń ardagerleri, Áskerı ınfraqurylymnyń bas basqarmasyna vedomstvolyq baǵynysty bólimshelerdiń jumys istep júrgen áskerı qyzmetshileri men azamattyq personaly elimizdiń áskerı-qurylys salasyn damytýǵa eleýli úles qosqany úshin medaldarmen, estelik belgilermen, gramotalarmen jáne alǵys hattarmen marapattaldy.

Qarýly kúshter Ulttyq áskerı-patrıottyq ortalyǵynyń shyǵarmashylyq ujymy daıyndaǵan kontsert áskerı qurylysshylarǵa tamasha kóńil-kúı syılady.