Qorǵanys mınıstrligi jýrnalısterdi áskerge shaqyrdy. VIDEO
Jýrnalıster desantshylardyń oqý-jattyǵýlary ótip jatqan birneshe núktede bolyp, olardyń kúndelikti jaýyngerlik daıyndyqtaryna kýá boldy. Jeke qarýdan atyp, jattyǵyp jatqan jaýyngerlerdiń sabaqtarymen tanysty.
Desantshy-jaýyngerler aldymen, áýe desanty kesheninde ótkiziletin jattyǵýlaryn kórsetti. Bul jerde árbir áskerı qyzmetshi úshin mindetti túrde atletızm, tez arada sheshim qabyldaý sııaqty qasıetterdi ıgerý shart.
Vedomstvo aqparatyna sáıkes, búginde osy bólimdegi desantshy sarbazdardyń oqý daıyndyǵy úshin barlyq qajetti jaǵdaılar jasalǵan. Oqý-materıaldyq baza jetkilikti. Nusqaýshylardyń denin joǵary bilikti ofıtserler quraıdy.
Elordadaǵy desantshylar bólimi qurylǵan kúnnen beri astanamyzda ótip turatyn memlekettik jáne halyqaralyq saıası mańyzy bar is-sharalardyń qaýipsizdigin qamtamasyz etýge at salysyp keledi. Osydan birer jyl buryn bas qalamyzda bolyp ótken 7-shi qysqy Azııa oıyndary men EQYU sammıtinde qaýipsizdikti baqylaýǵa tartylǵan bolatyn. Osyndaı memlekettik mańyzy bar is-sharalardaǵy arnaıy jabdyqtalǵan blog-beketterdegi qyzmetin olar búgin de jurt nazaryna usyndy.
Kógildir beretti desantshylardyń jaýyngerlik ázirligin jekpe-jek urysynsyz elestetý múmkin emes. Muzdaı qarýlanǵan, shynyqqan shymyr jigitter kórsetken bul urys túriniń elementteri desantshylardyń erjigit degen atqa laıyq ekenin taǵy bir ret dáleldedi.
Odan soń jýrnalıster bólimniń bronedromynda bolyp, T-72 tanksiniń jaýyngerlik múmkindikterin baqylady.
Jýrnalısterge shaǵyn suhbat bergen bólim komandıri general-maıor Almas Jumakeev: «Bizdiń sarbazdar kúndelikti oqý-jattyǵýlar barysynda kásibı tájirıbelerin jetildirip, jaýyngerlik sheberlikterin arttyrýǵa múmkindik alady. Sol sebepti desantshylarǵa júkteler negizgi tapsyrma moraldyq jaǵynan turaqty, densaýlyǵy myqty, saýatty, kez kelgen tapsyrmany oryndaýǵa qabiletti kásipqoıdy daıyndaý bolyp tabylady»,-dedi.
Desantshylar bóliminde bolǵan BAQ ókilderi qysqy oqý kezeńindegi jaýyngerlik daıyndyq barysy, sabaqtar men jattyǵýlar kestesi týraly jalpy alǵanda, desantshylardyń qyzmeti men turmysy jaǵdaıynan tolyq habardar bolyp tarqasty.