Qorǵanys mınıstrligi joǵary oqý oryndaryndaǵy áskerı kafedralardyń bilim berý júıesin ózgertýdi usynady
Bul týraly mınıstrliktiń baspasóz qyzmetinen habarlandy.
«Áskerı kadrlardy daıyndaý tujyrymdamasy áskerı kafedralardyń bilim berý júıesin ózgertýdi usynady. Stýdentter birinshi kýrstan bastap, sońǵy kýrsqa deıin áskerı bilim ala alady. Bul stýdentter qatardaǵy jas jaýynger kýrsynan bastap, vzvod, rota komandırleri býynyna deıingi laýazymdarǵa kezeń-kezeńmen ótetinin bildiredi», - delingen baspasóz baıanynda.
Usynylǵan jańa tujyrymdama jobasyna sáıkes elimizdegi 25 áskerı kafedrada tek zapastaǵy ofıtserler ǵana daıarlanbaıdy. Keleshekte áskerdi qajetti materıaldyq-tehnıkalyq qamtamasyz etý mamandarymen osynda bilim alǵan ofıtserler tolyqtyratyn bolady. Bul óz kezeginde qorǵanys mınıstrliginiń áskerı oqý oryndarynda tek komandalyq laýazymdarǵa ofıtserler daıyndaýǵa tolyq múmkindik beredi.