Qorǵanys mınıstrligi Jambyldaǵy ahýal týraly: Oq-dáriler janyp, áli de jarylýy múmkin

JAMBYL OBLYSY. QazAqparat – Qorǵanys mınıstriligi óńirdegi ınjenerlik oq-dári qoımasyndaǵy ahýalǵa qatysty túsinikteme berdi. 2021 jyldyń 26 tamyzy kúni saǵat 19:00-de Baızaq aýdanynda ornalasqan áskerı bólimshede órt shyqqan, dep habarlaıdy QazAqparat vedomstvonyń baspasóz qyzmetine silteme jasap.

Órttiń alǵashqy mınýtynan bastap dabyl boıynsha áskerı bólimsheniń órt sóndirý komandalary kóterildi, olar shynjyr tabandy jáne dóńgelekti tehnıkamen órtti sóndirýge kiristi.

Jambyl oblysy TJD órt sóndirý toptary shaqyryldy. Órttiń shyǵý sebepteri áli anyqtalmady. Jalyn tez arada oq-dári saqtalǵan qoımalarǵa qaraı ótti. Injenerlik oq-dáriler – bul tabıǵı (jartastar, taýlar) jáne qoldan jasalǵan (ǵımarattar, qurylystar) ártúrli nysandardy jarýǵa arnalǵan.

Olardy jaýdyń tehnıkasy men jumys kúshin jarý úshin de qoldanýǵa bolady. Olar: qoparǵysh, fýgas, jaıaý áskerge qarsy jáne tankige qarsy mınalar, trotıl jáne basqa da jarylǵysh zattar.

Órtti sóndirý múmkin bolmaı, ol basqa qoımalarǵa qaraı ótip ketti. Saldarynan birneshe ınjenerlik oq-dári jarylysy oryn aldy.

Kýágerler vıdeoǵa túsirip alǵan aspandaǵy izder qoımada saqtalǵan dabyl patrondarynyń órtenýinen bolýy múmkin.

Artıllerııalyq jáne reaktıvti oq-dárilerge qaraǵanda ınjenerlik oq-dárilerde snarıad ornatylmaǵan. Órt pen jarylys kezinde olar úlken qoparylys tolqynyn, jalyn men shý áserin týdyrady. Alaıda iri bólikter, synyqtar men fragmentter jan-jaqqa ushpaıdy.

Jarylystar ýaqyt óte toqtady, alaıda órt áli sóngen joq. Injenerlik oq-dári men jarylǵysh zattar úlken qoparylys tolqynyn, jalyn men shý áserin týdyryp, janyp, jarylýy múmkin.

Áskerı bólim men ınjenerlik oq-dári qoımasy 1972 jyldan beri bar. Arystaǵy órtten keıin 2019 jyldan bastap qoımadaǵy ınjenerlik oq-dárilerdiń bir bóligi osynda jetkizilgen. Bul oq-dáriler jergilikti jarylystarǵa arnalǵan jáne alys qashyqqa ushatyn snarıadtarmen jabdyqtalmaǵan.