Qorǵanys mınıstrligi Jambyl oblysyndaǵy jarylysqa qatysty BAQ kótergen máselelerge túsinikteme berdi
«Injenerlik oq-dáriler qoımasynan órt shyqqan áskerı bólim «Ońtústik» óńirlik qolbasshylyǵynyń quramyna kiredi.
2016 jyldan bastap 2021 jyldyń mamyr aıyna deıin áskerı bólimniń komandıri Serik Baısaqalov bolǵan. Qorǵanys mınıstriniń buıryǵymen podpolkovnık Serik Baısaqalov 48 jasqa tolǵanda Qarýly Kúshterdiń qatarynan zapasqa shyǵaryldy. Al naqty Baısaqalov 2021 jyldyń 29 shildesinde bólimniń tiziminen alyndy», delingen habarlamada.
Mınıstrliktiń málimdeýinshe, maýsym aıynda óńirlik qolbasshylyqtyń komıssııasy bólimniń shtab bastyǵy maıor Aslan Baqytjanovqa komandırdiń isteri men laýazymyn ýaqytsha atqarýdy tapsyrǵan. Bul jóninde bólim komandıriniń 2021 jylǵy 21 maýsymdaǵy №109 tıisti buıryǵy bar. Qazirgi kezde quzyretti organdar shtattyq bólim komandırin taǵaıyndaý maqsatynda jasalatyn tekserý protsedýrasy men kandıdatqa arnaıy ruqsat berý rásimin júrgizýde.
«Órt bastalysymen áskerı bólimniń shtattyq órt sóndirý komandasy órt sóndirýshi eseptoptar kelgenshe tez arada ony oqshaýlaýǵa kirisken jáne Jambyl oblysynyń TJD-ǵa habarlaǵan.
Budan ári Іshki ister mınıstriniń 2017 jylǵy 26 maýsymdaǵy
№ 446 buıryǵymen bekitilgen órt sóndirýdiń qoldanystaǵy qaǵıdalaryna sáıkes órt sóndirýge kelgen órtke qarsy qyzmet garnızonynyń aǵa laýazymyndaǵy adam oǵan tikeleı basshylyq etedi. Órt sóndirý basshysy osy mindetterdi oryndaýǵa qatysatyn jeke quramdy, sondaı-aq órt sóndirýge jumyldyrylatyn kúshterdi basqarýǵa ókilettilik beriledi.
Ol úshin TJD-nyń órt sóndirý qyzmetinde eldi mekende bolǵan órt kezinde qaýipti barlyq obektiler týraly málimetter bolýy tıis», delingen habarlamada.
Vedomstvo Baızaq aýdanyndaǵy úılerdiń aýlalarynyń birinen tabylǵan oq-dárilerdiń qaldyqtaryna qatysty túsinikteme berdi.
«Qorǵanys mınıstrligi paıdalanýǵa jaramsyz oq-dárilerdi Indýstrııa jáne ınfraqurylymdyq damý mınıstrliginiń vedomstvolyq uıymy – «Qaztehnologııa» aktsıonerlik qoǵamyna beredi. Sodan keıin «Qaztehnologııa» AQ oq-dárilerdi óndiristik kádege jaratý, olardyń quramyndaǵy jarylys qaýpi bar zattardy alý jáne olardy joıý protsesin júrgizedi. Osydan keıin ǵana oq-dárilerdiń synyqtary elektrondyq gosreestr.kz. saýda alańy arqyly osyǵan ýákilettik berilgen «Qaztehnologııa» AQ arqyly satýǵa shyǵarylady. Tabylǵan snarıadtardyń qalyptary men oqsaýyttary – bul oq-dárilerdi kádege jaratqannan keıin alynǵan jáne elektrondy saýda alańy arqyly jeke kásiporynǵa satylǵan metall synyqtary. Olar qorshaǵan ortaǵa eshqandaı qaýip tóndirmeıdi», delingen habarlamada.
Vedomstvonyń túsindirýinshe, bul metall synyqtaryn «Baqtııar-Group» jaýapkershiligi shekteýli seriktestigi 2021 jylǵy naýryzdyń sońynda Túrkistan oblysy Arys qalasyndaǵy «Qazaqtehnologııa» AQ metall synyqtarynyń qoımasymen jasalǵan shartqa sáıkes satyp alǵan. «Arys qalasynan Jambyl oblysyndaǵy qoımaǵa artıllerııa oq-dárileri – snarıadtar, zymyrandar tasymaldanǵan emes. Arys qalasynan Jambyl oblysyndaǵy qoımaǵa burynǵy órtten aman qalǵan ınjenerlik oq-dárilerdiń bir bóligi ǵana jetkizildi. Óıtkeni bul qoımada da osyndaı oq-dáriler túri saqtalady. Bul qoımada artıllerııa oq-dárileri saqtalmaıdy», delingen habarlamada.
