Qorǵanys mınıstrligi zapastaǵy ofıtserlerdi áskerge shaqyrýǵa qatysty túsinik berdi

NUR-SULTAN. QazAqparat – QR Qorǵanys mınıstrligi QR Úkimetiniń zapastaǵy ofıtserlerdi áskerı qyzmetke shaqyrý týraly Qaýlysyna resmı túsinik berdi, dep habarlaıdy QazAqparat.

«Qazaqstan Respýblıkasy Úkimetiniń Qaýlysyna sáıkes 2022 jyly áskerı qyzmetke jaramdy jáne odan ótpegen zapastaǵy ofıtserler eki jyl merzimge áskerı qyzmetke shaqyrylatyn bolady.

Zapastaǵy ofıtserlerdi shaqyrý jyl saıyn júzege asyrylady. «Áskerı qyzmet jáne áskerı qyzmetshilerdiń mártebesi týraly» QR Zańynyń 32-babyna sáıkes, áskerı qyzmetke jaramdy 29 jasqa deıingi zapastaǵy ofıtserler Úkimet qaýlysy negizinde ýákiletti organdardyń ótinimderi boıynsha beıbit ýaqytta ofıtserler quramynyń laýazymdarynda áskerı qyzmet ótkerý úshin shaqyrylady.

Bıyl zapastaǵy 190 ofıtser, onyń ishinde Qarýly kúshterdiń 150 ofıtseri jáne Ulttyq qaýipsizdik komıteti Shekara qyzmetiniń 40 ofıtseri áskerge shaqyrylatyn bolady», - delingen mınıstrlik habarlamasynda.

Eske salaıyq, búgin QR Premer-Mınıstri Álıhan Smaıylov zapastaǵy ofıtserlerdi áskerı qyzmetke shaqyrý týraly qaýlyǵa qol qoıǵan bolatyn.

Qujat alǵashqy resmı jarııalanǵan kúnnen keıin kúntizbelik on kún ótken soń qoldanysqa engiziledi.